لڑکی کا بیرونِ ملک جانے کیلئے اپنے اغوا کا ڈرامہ، والد سے 30 لاکھ تاوان مانگ لیا

بھارت میں 21 سالہ لڑکی نے بیرونِ ملک جانے کے لیے اپنے ہی اغوا کا ڈرامہ رچاکر والد سے 30 لاکھ بھارتی روپے تاوان کا مطالبہ کردیا۔

یہ واقعہ بھارتی ریاست مدھیہ پردیش کے شہر اندور میں پیش آیا جہاں کاویا دھاکڑ نامی لڑکی نے اپنے دو دوستوں کے ساتھ مل کر یہ سارا کھیل کھیلا۔

راجستھان پولیس کے مطابق کاویا اندور سے دوستوں کے ساتھ داخلہ ٹیسٹ کی تیاری کے لیے راجستھان آئی تھی، اس نے اپنے منصوبے کو عملی جامہ پہنانے سے پہلے شہر کوٹا میں تین دن قیام کیا، یہ تینوں ہاسٹل میں رہے اور کوچنگ کلاسز میں شرکت کی۔

پولیس نے بتایا کہ 18 مارچ کو کاویا کے والد نے پولیس میں بیٹی کے اغوا کی رپورٹ درج کروائی اور پولیس کو کچھ تصاویر بھی دکھائیں جو کہ انہیں بھیجی گئیں، تصاویر میں بیٹی کے ہاتھ رسی سے بندھے تھے۔

ساتھ ہی اس کے والد نے بتایا کہ اغوا کاروں نے 30 لاکھ بھارتی روپوں کا مطالبہ کیا ہے جس پر پولیس نے تفتیش کا آغاز کیا۔

بعدازاں جب انہوں نے کوچنگ سے رابطہ کیا تو اس کے دو دوستوں میں سے ایک کو پولیس نے حراست میں لے لیا جس نے تمام تفصیلات پولیس کو بتائیں کہ بیرونِ ملک جانے کی خواہش رکھنے والی کاویا نے یہ ڈرامہ کیا۔

دوست نے یہ بھی بتایا کہ کاویا کے اغوا کا فوٹو شوٹ ایک دوست کے کمرے میں کیا گیا، پولیس کو اب تک کاویا کی تلاش ہے اور اس حوالے سے کوٹا سمیت قریبی شہروں میں چھاپے مارے جارہے ہیں۔