سندھ حکومت نے 646 اساتذہ کو ٹیچنگ لائسنس جاری کردیے
30 مارچ ، 2024
سندھ حکومت نے 646 اساتذہ کو ٹیچنگ لائسنس جاری کردیے۔
اعلامیے کے مطابق سکھر آئی بی اے ٹیسٹنگ سروس نے ٹیچنگ لائسنس ٹیسٹ کے نتائج جاری کردیے۔
اعلامیے میں کہا گیا ہے کہ سندھ بھر سے 28 جنوری 2024 کو سندھ ٹیچنگ لائسنس پالیسی 2023 کے تحت ہونے والے امتحان میں سرکاری اور نجی سیکٹر سے 4000 امیدواروں نے حصہ لیا جس میں سے 646 امیدوار ایلیمنٹریٹیچنگ لائسنس حاصل کرنے میں کامیاب ہوئے۔
اعلامیے کے مطابق 100 نمبر کا ٹیسٹ دو سیکشنز پر محیط تھا جس میں سے امیدوار کو ایک سیکشن میں کم سے کم 40 میں سے 20 جبکہ دوسرے سیکشن میں 60 میں سے 30 نمبر حاصل کرنے ضروری تھے۔
صوبائی وزیر تعلیم سردار شاہ نے کامیاب اساتذہ کو مبارکباد پیش کی اور کہا کہ سندھ نے ٹیچنگ لاسئنس پالیسی کے نفاذ کے بعد ٹیسٹ کا مرحلہ کامیابی سے طے کر لیا ہے۔
ان کا کہنا تھاکہ کامیاب ہونے والے ٹیچرز کو مراعات اور پروموشنز کے حوالے سے ان کو سروس رولز کے تحت فائدہ بھی دیا جائے گا۔
