01 اپریل ، 2024 
افغان حکومت کے بدلتے رویے سے ہمارے پاس ان کیلئے آپشن محدود ہو رہے ہیں: خواجہ آصف
01 اپریل ، 2024
اسلام آباد: وزیر دفاع خواجہ آصف نے کہا ہے کہ پاکستان میں حالیہ دہشت گردی کا منبہ افغانستان میں ہے، افغان حکومت کے دن بدن بدلتے رویے سے ہمارے پاس ان کیلئے آپشن محدود ہو رہے ہیں۔
وزیر دفاع نے پارلیمنٹ ہاؤس میں میڈیا سے گفتگو کرتے ہوئے کہا کہ حالیہ دہشت گردی کا منبہ افغانستان میں ہے اور جب تک افغانستان ٹی ٹی پی کی پناہ گاہیں اور سہولت کاری نہیں چھوڑے گا تب تک یہ سلسہ چلتا رہے گا۔
انہوں نے کہا افغان حکومت کے دن بدن بدلتے رویے سے ہمارے پاس ان کیلئے آپشنز محدود ہورہے ہیں۔
بشام حملے سے متعلق بات کرتے ہوئے خواجہ آصف نے کہا چینی ورکرز پر حملے کی تحقیقات جاری ہیں اور اس میں چینی تحقیقاتی ٹیم بھی شامل ہے جبکہ تحقیقات میں کچھ لیڈز (رہنمائی) بھی ملی ہیں۔
وزیر دفاع نے ایران پاکستان گیس پائپ لائن منصوبے سے متعلق بات کرتے ہوئے کہا کہ امریکا ایران سے گیس نہ لینے کا متبادل بتائے، ہم عالمی مارکیٹ سے مہنگی ایل پی جی خریدتے ہیں اور اگر کوئی ہمسایہ اچھے نرخ پر گیس دیتا ہے تو اس سے گیس لینا ہمارا حق ہے۔
وزیر دفاع خواجہ آصف نے مزید کہا کہ بھارت کے ساتھ تعلقات کا اپنا پس منظر ہے، انہوں نے امید ظاہر کی کہ بھارتی الیکشن کے بعد شاید تعلقات بہتر ہوسکیں۔
