26 مئی ، 2024 
پاکستان
سول آرمڈ فورسزکی کوششوں سے ملکی خزانے کو اربوں روپے کا فائدہ ہو رہا ہے: وزیراعظم شہباز شریف/ فائل فوٹو
ملکی تاریخ میں پہلی بار اسمگلنگ میں خاطر خواہ کمی دیکھنے میں آئی ہے: وزیر اعظم
26 مئی ، 2024
وزیراعظم شہباز شریف کا کہنا ہے کہ سول آرمڈ فورسزکی کوششوں سے ملکی تاریخ میں پہلی بار اسمگلنگ میں خاطر خواہ کمی دیکھنے میں آئی ہے۔
وزیراعظم شہباز شریف کی زیر صدارت اعلیٰ سطح کا اجلاس ہوا جس میں آرمی چیف جنرل سید عاصم منیر نے بھی خصوصی شرکت کی۔
اعلامیے کے مطابق اجلاس میں انسداد اسمگلنگ سے متعلق سول آرمڈ فورسز کی کارکردگی کا جائزہ لیا گیا۔
اس موقع پر وزیراعظم نے کہا کہ ملکی تاریخ میں پہلی بار اسمگلنگ میں خاطر خواہ کمی دیکھنے میں آئی ہے، اسمگلنگ کے خلاف جنگ میں جام شہادت نوش کرنے والوں کو قوم سلام پیش کرتی ہے۔
انہوں نے مزید کہا کہ سول آرمڈ فورسزکی کوششوں سے ملکی خزانے کو اربوں روپے کا فائدہ ہو رہا ہے۔
