کراچی…کراچی میں رات 12 بجے کے بعد سے مختلف پرتشدد واقعات میں 5 افراد جاں بحق ہوگئے، دوسری جانب پولیس نے کلفٹن کے علاقے میں قائم رہائشی عمارت میں ٹارگٹڈ آپریشن کر کے ایک پولیس اہلکار سمیت 3افراد کو حراست میں لے لیا۔ پولیس کے مطابق گولیمار کے علاقے میں پیتل گلی پر واقع لیاقت چوک پر نامعلوم ملزمان نے فائرنگ کرکے 45 سالہ وسیم صدیقی کو ہلاک کردیا، سہراب گوٹھ کے علاقے ایوب گوٹھ سے ایک شخص کی پھندا لگی ہوئی لاش ملی، گارڈن کے علاقے میں چٹریا گھر کے قریب سے دو افراد کی بوری بند لاشیں ملیں،جن کی شناخت 45 سالہ مولا بخش اور 28 سالہ بلال کے نام سے ہوئی،جبکہ اولڈسٹی ایریا کے علاقے میں پرانا حاجی کیمپ کے قریب فائرنگ سے 27 سالہ عاصم ہلاک ہوگیا۔ دوسری جانب کلفٹن بلاک 9 میں واقع رہائشی عمارت میں پولیس نے مشتبہ افراد کی موجودگی کی اطلاع پر سرچ آپریشن کیا،جس کے دوران پولیس اہلکار سمیت 3 افراد کو حراست میں لے لیا گیا، جبکہ گزشتہ رات گلشن اقبال کے علاقے موتی محل اور ناظم آباد میں گول مارکیٹ کے قریب 2 مبینہ پولیس مقابلوں میں 3 ڈاکو ہلاک اور پولیس اہل کار زخمی ہوئے تھے۔