کھیل

ندا ڈار ایشیا کپ میں بھارت کو ہرانے کیلئے پُرامید

14 جولائی ، 2024

ندا ڈار ایشیا کپ میں بھارت کو ہرانے کیلئے پُرامید — گذشتہ ایشیا کپ کا سیمی فائنل کھیلے تھے لیکن کامیابی نہیں ملی تھی، اس بار کافی تیاری کی ہے سیمی فائنل اور فائنل جیتنے کی امیدیں نظر آرہی ہیں: کپتان__فوٹو: فائل

پاکستان ویمن ٹیم کی کپتان ندا ڈار کا کہنا ہے کہ ویمن ایشیا کپ میں پہلا میچ ہی بھارت سے کھیلنا ہے جس کیلئے کافی جوش ہے کیونکہ اس میچ میں کسی کو اٹھانا اور جگانا نہیں پڑتا۔

جیو نیوز سے گفتگو کرتے ہوئے انہوں نے کہا کہ بھارت کو پہلے بھی ہرایا ہے اس بار بھی جیت کر ایشیا کپ کا آغاز شاندار انداز سے کرنا چاہیں گے۔

ندا ڈار نے کہا کہ گذشتہ ایشیا کپ کا سیمی فائنل کھیلے تھے لیکن کامیابی نہیں ملی تھی، اس بار کافی تیاری کی ہے سیمی فائنل اور فائنل جیتنے کی امیدیں نظر آرہی ہیں ، میری کپتانی میں سیریز میں تو بہت کامیابیاں حاصل کیں لیکن کوئی ٹرافی نہیں اٹھائی۔

یہ بھی پڑھیں

کپتان قومی کرکٹ ٹیم نے کہا کہ وہ چاہتی ہیں کہ ان کی قیادت میں پاکستان ویمن ٹیم ایشیا کپ یا ورلڈ کپ کی ٹرافی اٹھائے ، ایشیا کپ سری لنکا میں ہے اور ورلڈ کپ بھی بنگلادیش میں ہوگا دونوں بڑے ایونٹ ایشین کنڈیشن میں ہیں اور ہمیں ایشین کنڈیشن میں کھیلنے کا زیادہ تجربہ ہے۔

انہوں نے کہا کہ ایشیا کپ سے ورلڈ کپ کی تیاری کا بہترین موقع ملے گا۔

کپتان ندا ڈار کا کہنا ہے پاکستان ویمن ٹیم میں پہلی بار تسمیہ رباب لفٹ آرم فاسٹ بولر آئی ہیں، ان کی شمولیت سے یقینی طور پر ٹیم کو فائدہ ہوگا جس پر کوچ جنید خان بہت کام کررہے ہیں۔

انہوں نے کہا کہ پی سی بی ویمن کرکٹ پر بہت توجہ دے رہا ہے اور اچھے اقدام بھی کررہا ہے، ایسے فیصلوں سے ویمن کھلاڑیوں کو اعتماد ملتا ہے۔

ندا ڈار کا کہنا ہے کہ پاکستان میں خواتین کی کرکٹ کو مزید اوپر جانے میں وقت لگے گا انہوں نے وہ وقت بھی دیکھا ہے جب ویمن کرکٹرز نہیں ہوتی تھیں لیکن اب لڑکیاں آرہی ہیں، جونئیر ٹیمیں بھی بن رہی ہیں ہم فوری طور پر نتائج پر جاتے ہیں۔

کپتان نے کہا حالانکہ جس سطح سے ویمن کرکٹ نے پروان چڑھنا شروع کیا ہے اس میں ابھی بھی وقت لگ سکتا ہے۔