20 اگست ، 2024 
انسداد دہشتگردی عدالت نے بشریٰ بی بی کو 9 مئی کے 12 مقدمات سے ڈسچارج کردیا
20 اگست ، 2024
انسداد دہشت گردی کی عدالت نے سابق وزیراعظم عمران خان کی اہلیہ بشریٰ بی بی کو سانحہ 9 مئی کے 12 مقدمات سے ڈسچارج کردیا۔
اڈیالہ جیل میں انسداد دہشت گردی عدالت کے جج ملک اعجاز آصف نے کیس پر سماعت کی۔ 9 مئی کے مقدمات کے تفتیشی افسران بھی عدالت میں پیش ہوئے جبکہ بشریٰ بی بی کی جانب سے سلمان صفدر عدالت میں پیش ہوئے۔
پنڈی پولیس نے بشریٰ بی بی کے جسمانی ریمانڈ کی استدعا کی۔
وکلا صفائی کی جانب سے جسمانی ریمانڈ کی درخواست پر دلائل دیے گئے۔ عدالت نے بشریٰ بی بی کے جسمانی ریمانڈ کی پولیس کی استدعا مسترد کردی اور انہیں 12 مقدمات سے ڈسچارج کردیا۔
بشریٰ بی بی کو راولپنڈی میں 9 مئی کے واقعات پر 12 مقدمات میں نامزد کیا گیاتھا۔ خیال رہے کہ عمران خان اور ان کی اہلیہ توشہ خانہ کے نئے ریفرنس میں جوڈیشل ریمانڈ پر اڈیالہ جیل میں قید ہیں۔
