لندن…متحدہ قومی موومنٹ کے قائد الطاف حسین نے کہا ہے کہ جمہوریت کے نام پر جبر کی بدترین شکل سامنے لائی جارہی ہے ،نہ پہلے کبھی ظلم کے آگے سرجھکایا ہے نہ آئندہ کبھی سرجھکائیں گے، ایم کیو ایم کے قائد الطاف حسین نے ایم کیو ایم کی رابطہ کمیٹی سے گفتگو کرتے ہوئے کراچی کے حالات پر تشویش کا اظہار کیا۔الطاف حسین نے کہا کہ ہمارے امن اور محبت کے پیغام کوہماری کمزوری تصور کرنے والے یہ جان لیں کہ کراچی کے عوام اپنے خلاف ہونے والی سازشوں اور نسل کشی پر اپنی حفاظت کے لئے انتہائی اقدامات پر مجبور ہوسکتے ہیں۔انہوں نے کہا کہ ہم نے نہ پہلے کبھی ظلم کے آگے سرجھکایا ہے نہ آئندہ کبھی سر جھکائیں گے۔ الطاف حسین نے کہا کہ میں جمہوریت کا زبردست حامی ہوں اور ہم نے جمہوری عمل کے ذریعے ہی اپنی تحریک کو ملک بھر میں پھیلایا ہے لیکن آج جمہوریت کے نام پر جبر کی بدترین شکل سامنے لائی جارہی ہے اور غیر جمہوری ہتھکنڈوں کے ذریعے جمہوریت کے مستقبل پر سوالیہ نشان لگائے جارہے ہیں۔انہوں نے کہا کہ جب عوام کو تحفظ دینے اور امن قائم کرنے کی ذمہ دار قوتیں عوام کو تحفظ دینے کے بجائے جرائم پیشہ افراد اور دہشت گردوں کی پشت پناہی کررہی ہوں تو عوام کو اپنی حفاظت کوخود کھڑا ہونا ہوگا۔