حتمی مسودے پر مشاورت کریں، بلاول نے بیرسٹر گوہر کو عمران خان سے ملاقات کی یقین دہانی کرادی

پاکستان پیپلزپارٹی کے چیئرمین بلاول بھٹو زرداری نے پاکستان تحریک انصاف کے چیئرمین بیرسٹر گوہر کو ان کی جماعت کے بانی عمران خان سے جیل میں ملاقات کی یقین دہانی کرادی۔

بلاول بھٹو نے مولانا فضل الرحمان اور بیرسٹر گوہر علی سے ملاقات کی۔ ذرائع کے مطابق اسدقیصر نے بلاول سے گفتگو کی اور کہا کہ آپ جمہوریت کےدعویدارہیں ہمیں اتنی آپ سےتوقعات ہیں۔

ذرائع نے بتایاکہ بلاول بھٹو زرداری نے بیرسٹر گوہر کو بانی پی ٹی آئی سے ملاقات کی یقین دہانی کرادی اور کہا کہ کل آپ کی بانی پی ٹی آئی سے ملاقات کا انتظام کرتا ہوں، کل آپ جائیں اور بانی پی ٹی آئی سے حتمی مسودے پرمشاورت کریں۔

ذرائع کا کہنا ہے کہ پی ٹی آئی نے بانی پی ٹی آئی سے حتمی آئینی ترمیمی مسودے پر مشاورت کیلئے  کمیٹی بنادی جس میں بیرسٹرگوہر، سلمان اکرم راجہ، علی ظفر اور حامد خان شامل ہیں، بانی پی ٹی آئی سےملاقات کرنے والوں میں اسد قیصر بھی شامل ہوں گے۔

بلاول بھٹو کی عمر ایوب اور بیرسٹر گوہر سے ملاقات، آئینی ترامیم کے مختلف پہلوؤں پر بات چیت

بلاول بھٹو کی عمرایوب اور بیرسٹر گوہر سے سرسری ملاقات گزشتہ روز قومی اسمبلی ہال میں ہوئی: ذرائع

ذرائع نے بتایاکہ کمیٹی بانی پی ٹی آئی کو آئینی ترمیمی بل پر بریفنگ دےگی۔

علاوہ ازیں تحریک انصاف کے چیئرمین بیرسٹر گوہر نے کہا ہے کہ مولانا فضل الرحمان سے ملاقات میں ہم ایک اتفاق رائے پر پہنچ گئے ہیں، کمیٹی نے وہی ڈرافٹ منظور کیا جس پر مولانا کے ساتھ ہمارا اتفاق رائے ہے۔

انہوں نے کہا کہ کل بانی پی ٹی آئی سے ملاقات کریں گے جس کے بعد حتمی مؤقف دیں گے۔

دوسری جانب پارلیمان کی خصوصی کمیٹی نے آئینی مسودہ متفقہ طور پر منظور کر لیا۔