سلمان اکرم نے پارٹی چیئرمین کے برعکس کمیٹی سے منظور شدہ مسودہ مسترد کردیا

اسلام آباد: پی ٹی آئی کے سیکرٹری جنرل سلمان اکرم راجہ نے پارٹی چیئرمین بیرسٹر گوہر خان کے برعکس کمیٹی سے منظور شدہ مسودہ مسترد کردیا۔

 جیو نیوز کے پروگرام’ نیاپاکستان‘ میں گفتگو کرتے ہوئے سلمان اکرم نے کہا کہ اس مسودے میں آئینی بینچ بنانے کا اختیار حکومت کو دیا گیا ہے جو قابلِ قبول نہیں۔

انہوں نے کہا کہ سپریم کورٹ کے چیف جسٹس کی تعیناتی بھی حکومت کو دی گئی ہے جس سے عدلیہ کی آزادی ختم ہوجائے گی لیکن پی ٹی آئی کو یہ مسودہ قابل قبول نہیں ہے۔

 اس سے قبل اپنے ایک بیان میں  پی ٹی آئی کے رہنما عامر ڈوگرکا کہنا تھا کہ  آئینی ترمیم کے مسودے پر مولانا اور بلاول کا اتفاق رائے ہو بھی جائے تو ہماری کمیٹی اڈیالہ جیل جائے گی اور حتمی فیصلہ وہیں ہوگا۔

خصوصی پارلیمانی کمیٹی کا اجلاس، خورشید شاہ پھونک ماریں گے اور معاملات ٹھیک ہوجائیں گے: عرفان صدیقی

خورشید شاہ کی سیاسی بصیرت، تدبر اور تجربے پر پورا بھروسہ ہے: لیگی سینیٹر

 انہوں نے کہا تھا کہ ہمیں جو ڈرافٹ دکھایا گیا اس میں کوئی ایسی چیز نہیں جو ہمارے لیے قاتلانہ ہو، ہمارے اور مولانا کے کچھ ارکان حکومت کے قبضے میں ہیں، اس لیے وہ جب چاہیں طاقت کے زور پر ترامیم کرا سکتے ہیں۔

دوسری جانب ذرائع کا بتانا ہے کہ  بانی پی ٹی آئی سے پارٹی کا5 رکنی وفد ملاقات کرےگا، وفد میں علی ظفر، بیرسٹرگوہر، صاحبزادہ حامد رضا، اسد قیصر اور سلمان اکرم راجہ شامل ہوں گے۔

یاد رہے کہ وزیراعظم شہباز شریف اور چیئرمین پیپلز پارٹی بلاول بھٹو زرداری آئینی ترامیم کے معاملے پر مولانا فضل الرحمان کو منانے کے لیے ان کے گھر تشریف گئے تھے ملاقات میں کوئی پیشرفت نہیں ہو سکی تھی۔