05 مارچ ، 2025 
وائرس کے ذریعے کرپٹو کرنسی چرانے کیلئے ہیکرز سرگرم، پاکستان سائبر ایمرجنسی نے ایڈوائزری جاری کردی
05 مارچ ، 2025
میلویئر وائرس کے ذریعے کرپٹو کرنسی والٹ ڈیٹا چرانے کے لیے ہیکرز سرگرم ہو گئے۔
پاکستان سائبر ایمرجنسی رسپانس ٹیم نے اس حوالے سے ایڈوائزری جاری کی ہے جس میں کہا گیا ہے کہ پی ڈی ایف فائلوں کی آڑ لے کر میلویئر وائرس پھیلایا جاتا ہے، جعلی بوٹ ڈیٹیکشن سسٹم کی تصاویر کا استعمال کر کے وائرس پھیلایا جاتا ہے اور وائرس سے چوری شدہ معلومات اور ڈیٹا کو ہیکنگ فورمز پر بیچا جا سکتا ہے۔
ایڈوائزری میں کہا گیا ہے کہ بوٹ ڈیٹیکشن سسٹم سے وسیع پیمانے پر فشنگ مہم کی نشاندہی کی گئی ہے، تصاویر پر کلک کرنے سے صارفین فشنگ ویب سائٹس پر منتقل ہو جاتے ہیں۔
سائبرایمرجنسی رسپانس ٹیم کی ایڈوائزری میں کہا گیا ہے کہ نقصاندہ پی ڈی ایف پہچاننےکی تربیت دی جائے اور جعلی ویب سائٹس کی نگرانی، دھوکہ دہی پر مبنی ڈومینز کو رپورٹ کیا جائے۔
ایڈوائزری میں حملوں کی روک تھام کے لیے تمام سسٹمز کو اپ ڈیٹ رکھنے کی سفارش کی گئی ہے اور کہا گیا ہے کہ ملٹی فیکٹر تصدیق کا نظام اپنایا جائے اور سائبر سکیورٹی دفاع کو مضبوط بنایا جائے۔
