پنجاب میں عید کے موقع پر بازاروں میں خواتین کے تحفظ کیلئے لیڈی پولیس اہلکار تعینات

پنجاب کے مختلف اضلاع میں عید کے موقع پر بازاروں میں خواتین کے تحفظ کیلئے لیڈی پولیس اہلکار تعینات کردی گئیں۔

رمضان المبارک کا آخری عشرہ جاری ہے اور بازاروں میں خریداروں کا بھی رش بڑھ گیا ہے۔ بازاروں اور مارکیٹس میں فیملیز بھی شاپنگ میں مصروف ہیں۔ ایسے میں پنجاب کے مختلف اضلاع میں بازاروں اور مارکیٹس میں خواتین کے تحفظ کیلئے لیڈی پولیس اہلکار تعینات کردی گئیں۔

مختلف اضلاع میں خواتین پولیس اہلکار موٹر سائیکل اور سائیکل پر مارکیٹوں کا گشت کر رہی ہیں۔

ضلع اوکاڑہ کی تحصیل رینالہ کے اے ایس پی سید دانیال حسن کا کہنا تھاکہ وزیراعلیٰ پنجاب کے وژن کے تحت اوکاڑہ پولیس نے ضلع میں 50 لیڈی کانسٹیبل پر مشتمل 30 موٹر سائیکل اور سائیکل اسکواڈ تیار کیا ہے، اس کا مقصد عید کے موقع پر فیملیز مارکیٹس کا رخ کرتی ہیں اور مارکیٹس میں کافی رش بڑھ جاتا ہے۔

انہوں نے کہا کہ رش کا فائدہ اٹھاتے ہوئے جرائم پیشہ افراد چھینا چھٹی، ہراساں اور مختلف جرائم کرتے ہیں اور ان تمام جرائم سے خاص کر خواتین کو بچانے کیلئے اوکاڑہ پولیس نے یہ اقدام اٹھایا ہے۔

اُدھر سرگودھا میں بھی بازاروں میں خواتین پولیس افسران پر مشتمل موٹر سائیکل اسکواڈ تشکیل دے دیا گیا اور بازاروں میں اضافی نفری بھی تعینات کردی گئی۔ ڈسٹرکٹ پولیس آفیسر محمد صہیب اشرف کاکہنا تھاکہ اسٹریٹ کرائمز، ہراسانی اور دیگر جرائم کی روک تھام کیلئے لیڈیز اسکواڈ اہم کردار ادا کرے گا۔

دوسری جانب بھکر میں بھی بازاروں میں خواتین پولیس اہلکار تعینات ہیں اور موٹر سائیکل اسکواڈ کا گشت بھی جاری ہے۔ عید کی خریداری کیلئے بازار آنے والی خواتین لیڈی اہلکار تعینات کرنے پر خوش ہیں۔ اس حوالے سے خواتین کا کہنا تھاکہ بازاروں میں خود کو محفوظ محسوس کرتی ہیں اور اس اقدام سے خوش ہیں۔