06 اپریل ، 2025 
پی ٹی آئی کے واٹس ایپ گروپ پر گنڈاپور کا عاطف خان پر طنز، صدر پشاور ریجن بننے پر تنقید بھی کی
06 اپریل ، 2025
خیبرپختونخوا کے وزیراعلیٰ علی امین گنڈا پور اور پارٹی رہنما عاطف خان کے درمیان اختلافات کھل کر سامنے آگئے ہیں۔
ذرائع کے مطابق پاکستان تحریک انصاف کے پارلیمنٹرینز کے واٹس ایپ گروپ میں علی امین گنڈا پور اور عاطف خان کے درمیان طنزیہ جملوں کا تبادلہ ہوا۔
علی امین گنڈا پور نے عاطف خان کو خراب کارکردگی کی بنیاد پر بانی پی ٹی آئی کے کہنے پر عہدے سے ہٹائے جانے کا ذکر کیا، اور عہدہ واپس ملنے پر طنز بھی کیا۔
وزیراعلیٰ نے واٹس ایپ گروپ میں عاطف خان کے صدر پشاور ریجن بننے پر تنقید کی جبکہ گروپ میں موجود دیگر ارکان نے عاطف خان کو مبارک باد دی۔
تاہم، عاطف خان نے وزیراعلیٰ کی طنز کو نظرانداز کرتے ہوئےکسی بھی قسم کا ردعمل نہیں دیا۔
ان کا کہنا تھا کہ وزیراعلیٰ نے جو کہا، اس پر تبصرہ نہیں کرتا، میں نے کسی کو کوئی ردعمل نہیں دیا۔
قبل ازیں جیو نیوز سے گفتگو کرتے ہوئے عاطف خان کا کہنا تھا میرے اور علی امین گنڈا پور کے درمیان اختلافات ہیں لیکن اسد قیصر اور دیگر پارٹی قیادت کے خلاف باتیں کرنا درست نہیں، وزیر اعلیٰ کو اپنی توجہ گورننس پر مرکوز رکھنی چاہیے۔
عاطف خان کا یہ بھی کہنا تھا اگر عمران خان نے ہمارے خلاف کوئی بات کی ہے تو اس کی تصدیق ہونی چاہیے۔
