08 اپریل ، 2025 
مائنز اینڈ منرل بل عمران خان کی رہائی سے مشروط کرنا مذموم عزائم کو ظاہر کرتا ہے: اختیار ولی
08 اپریل ، 2025
وزیراعظم شہباز شریف کے کوآرڈی نیٹر برائے خیبرپختونخوا امور اختیارولی نے کہا ہے کہ مائنز اینڈ منرل بل پاکستان تحریک انصاف کے بانی عمران خان کی رہائی سے مشروط کرنا مذموم عزائم کو ظاہر کرتا ہے۔
اپنے بیان میں اختیارولی کا کہنا تھاکہ خیبرپختونخوا میں قدرتی وسائل میں کرپشن سے متعلق وائٹ پیپر جاری کریں گے اورخیبرپختونخوا میں کون کون مال بنارہا ہے سب سامنے لائیں گے۔
انہوں نے کہا کہ پی ٹی آئی نے ہمیشہ عوام دشمن پالیسیوں کو پروان چڑھایا، پی ٹی آئی والے چاہتے ہیں ملک میں انتشار ہو، پاکستان دیوالیہ ہوجائے لیکن ملکی وحدت کو نقصان پہنچانے کی کوئی کوشش کامیاب نہیں ہونے دیں گے۔
ان کا کہنا تھاکہ مائنز اینڈ منرل بل پاکستان تحریک انصاف کے بانی عمران خان کی رہائی سے مشروط کرنا مذموم عزائم کو ظاہر کرتا ہے تاہم بانی پی ٹی آئی کی رہائی کی بھونڈی کوشش کامیاب نہیں ہونے دیں گے۔
اختیار ولی کا کہنا تھاکہ بانی پی ٹی آئی اور ان کے حواریوں نے ہمیشہ بلیک میلنگ کی سیاست کی، خیبرپختونخوا حکومت کو عوام دشمن پالیسیاں ترک کرنا ہوں گی۔
