ویٹی کن سٹی… ارجنٹیناسے تعلق رکھنے والے ماریوبرگوگلیو کوکیتھولک مسیحیوں کاپاپائے روم منتخب کرلیا گیا ہے۔ و ہ پوپ فرانسس کہلائیں گے۔ انہوں نے دنیا میں بھائی چارے کی دعا کی اور اپنے لیے بھی دعاکی اپیل کی۔ کیتھولک مسیحیوں کے مرکز ویٹی کن نے اپنی دوہزارسال کی تاریخ میں نئے باب کا اضافہ کیاہے۔ کارڈینلز کے پانچویں اجلاس کے بعد چمنی سے سفید دھواں نکلا اور بینی ڈکٹ دورکے برعکس اس بارفوراً گھنٹیاں بھی بجیں تولوگوں کے چہروں پرپوپ کے انتخاب کی خوشی امڈتی نظرآئی مگر ابھی حیرت میں بھی اضافہ ہونا تھا۔ سینٹ پیٹرزبیسلیکاکی بالکونی پرقریباًایک گھنٹے تک لوگوں کو یہ جاننے کیلئے نظریں مرکوزرکھناپڑیں کہ پوپ منتخب کس کارڈینل کوکیاگیاہے۔ وہ ویٹی کن جوخودبھی ٹوئٹر کااستعمال کرتاہے اس وقت تک خاموش رہاجب تک لاطینی امریکاکے پہلے پوپ ماریوبرگوگلیودیدارکیلئے نہ آگئے۔ 76 برس کے یہ وہ نئے پوپ ہیں جو اطالوی ریلوے ورکرکے بیٹے ہیں اورکیمسٹری ،نفسیات اور فلسفے کے استاد، ایک ایسے شخص جو اپنی عاجزی اور سادہ زندگی کے حوالے سے جانے جاتے ہیں، وہ جنہوں نے پرتعیش رہائش گاہ چھوڑکرارجنٹیناکے فلیٹ میں رہنے کوترجیح دی ، آرام دہ گاڑی اورڈرائیورپربس کے سفرکوفوقیت دی۔ یہی وجہ ہے کہ جب انہوں نے اپنیلئے فرانسس کانام چناتولوگوں کوحیرت نہیں ہوئی۔ وہ فرانسس جنہوں نے حضرت عیسیٰ سے محبت میں امیری چھوڑی اورظلم وستم سہے۔ لوگوں کودعادینے سے پہلے نئے پوپ نے اس منصب سے سبکدوش بینی ڈکٹ کیلئے دعا مانگی اورپھراپنے لیے۔پوپ فرانسس نے کہا کہ کارڈینلزنے انہیں زمین کے کونے سے تلاش کرلیاہے، پوپ فرانسس اعتقادات پرسختی سے کاربندمگرسماجی انصاف کے حامی تصورکیے جاتے ہیں۔ وہ اپنے ملک کے لوگوں کوکہہ آئے تھے کہ اگر پوپ منتخب کرلیے جائیں توانہیں مبارکباد دینے اٹلی آنے کے بجائے وہ رقم کسی غریب کودے دی جائے۔ تجزیہ کاروں کاخیال ہے کہ کرپشن و جنسی بے راہ روی کے الزامات اور جدیدیت کے چیلنجز کا سامنا کرے والے ویٹی کن کی کشتی کومنجدھارسے نکالناپوپ فرانسس کیلئے بھی اہم رہیگا۔