اسلام آباد. . . .. . . این آر او کے عدالتی فیصلے کے مطابق سوئس حکام کو خط نہ لکھنے پر وزیراعظم سید یوسف رضا گیلانی کے خلاف توہین عدالت کیس کی سماعت آج سپریم کورٹ میں ہو گی۔ سیکرٹری کابینہ و دفاع نرگس سیٹھی اپنا بیان رکارڈ کرائیں گی۔جسٹس ناصر الملک کی سربراہی میں سپریم کورٹ کا سات رکنی لارجر بنچ وزیراعظم کے خلاف این آر او کے خلاف عدالتی فیصلے پر عمل درآمد نہ کرنے پرتوہین عدالت کیس کی سماعت کرے گا۔ وزیراعظم کے وکیل اعتزاز احسن نے سابق وزیر قانون بابر اعوان ، سیکرٹری قانون مسعود چشتی اور وزیراعظم کی سابق پرنسپل سیکرٹری نرگس سیٹھی کو بطور عدالتی گواہ طلب کرنے کی درخواست دائر کی تھی۔ اعتزاز احسن کا کہنا تھا کہ وزیراعظم کو وزارت قانون کی جانب سے بھجوائی گئی سمریوں میں سوئس حکام کو خط نہ لکھنے کا مشورہ دیا گیا۔ وہ قانونی معاملات پر ملنے والی رائے پر عمل درآمد کے پابند تھے۔ ایک موقع پر اعتزاز احسن کا کہنا تھا کہ عدالتی کارروائی کے نتیجے میں منتخب وزیراعظم کو سزا بھی ہو سکتی ہے اس لئے انہیں دفاع کے تمام مواقع ملنے چاہئیں۔ توہین عدالت کیس میں وزیراعظم گیلانی پر فرد جرم عائد ہو چکی ہے۔