لندن…متحدہ قومی موومنٹ کے قائد الطاف حسین نے لاہور سے کراچی آنے والی شالیمار ایکسپریس ٹرین میں دھماکے کی سخت ترین الفاظ میں مذمت کی ہے اورواقعے میں متعدد افراد کے ہلاک و زخمی ہونے پر دلی افسوس کااظہار کیا ہے۔اپنے بیان میں الطاف حسین نے کہا ہے کہ واقعے کی فوری تحقیقات کرائی جائے،انھوں نے واقعے میں ہلاک ہونے والے افراد کے لئے دعا کی کہ اللہ تعالیٰ مرحومین کو اپنی جواررحمت میں اعلیٰ مقام عطا فرمائے اور لواحقین کو صبر جمیل عطا کرے اور زخمیوں کی جلد و مکمل صحتیابی کیلئے دعا کی۔دریں اثناء الطاف حسین نے معروف کمپیئر اور کسوٹی پروگرام کے میزبان قریش پور کے انتقال پر گہرے دکھ اور افسوس کا اظہار کیا ہے ۔اپنے تعزیتی بیان میں انھوں نے مرحوم کے تمام لواحقین سے دلی تعزیت و ہمدردی کااظہار کرتے ہوئے انہیں صبر کی تلقین کی ۔علاوہ ازیں متحدہ قومی موومنٹ کی رابطہ کمیٹی کے ڈپٹی کنوینر اور حق پرست رکن قومی اسمبلی ڈاکٹر خالد مقبول صدیقی نے حیدرآباد میں ندی میں نہاتے ہوئے کرنٹ لگنے سے 4بچوں کی المناک ہلاکت پر گہرے دکھ اور افسوس کااظہار کیا ہے ۔ ایک تعزیتی بیان میں انہوں نے ہلاک ہونے والے بچوں کے تمام سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی ۔ انہوں نے کہا کہ بارش اور سیلابی کیفیت کے سبب ہونے والے حادثات نے کئی انسانی جانیں لیں لیکن 4بچوں کی پانی میں کرنٹ لگنے سے ہلاکت پر ہر شخص رنجیدہ اور غمزدہ ہے ۔ انہوں نے سندھ بھر میں ندی اور نالوں کے قریب رہائش پذیر آبادیوں کے عوام سے اپیل کی کہ وہ ندی اور نالوں سے دور رہیں کیونکہ ان میں طغیانی ہے ، پانی کا بہاؤ بہت تیز ہے اور ایسے پانی میں حادثات کا شدید خطرہ ہے ۔ ڈاکٹر خالد مقبول صدیقی نے دعا کی کہ اللہ تعالیٰ ہلاک ہونے والے بچوں کو اپنی جواررحمت میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ علاوہ ازیں رکن رابطہ کمیٹی احمد سلیم صدیقی نے معرو ف کمپےئر قریش پور کے انتقال پر ان کی رہائشگاہ واقع ناظم آ باد میں ان کے بھائی عزیزاختر سے ملاقات کی اور قریش پورکے انتقال پر الطاف حسین کی جانب سے دلی تعزیت کی۔