25 جون ، 2025 
کراچی سمیت سندھ بھر میں 9،10 محرم کو موٹرسائیکل کی ڈبل سواری پر پابندی عائد
25 جون ، 2025
کراچی: محکمہ داخلہ سندھ نے 9 اور 10 محرم الحرام کو صوبے میں موٹر سائیکل کی ڈبل سواری پر پابندی کا اعلان کردیا۔
پابندی سے متعلق محکمہ داخلہ سندھ نے نوٹیفکیشن جاری کردیا ہے۔
محکمہ داخلہ سندھ کی جانب سے جاری نوٹیفکیشن کے مطابق 9 اور 10 محرم الحرام کو صوبے میں موٹر سائیکل کی ڈبل سواری پر پابندی ہوگی۔
نوٹیفکیشن کے مطابق 12سال سے کم عمر بچے، ضعیف افراد اور صحافی پابندی سے مستثنٰی ہوں گے۔
محکمہ داخلہ سندھ کے مطابق یکم تا دس محرم ہیلی کیم کا استعمال ممنوع قرار دیا گیا ہے، جلوس مجالس کے اوقات میں بالائی حصے پرکھڑے ہونے پر پابندی ہوگی۔ نفرت انگیز تقاریر، تشہیری بینرز، لاؤڈ اسپیکر اور وال چاکنگ پر پابندی ہوگی۔
پاکستان کے قومی خلائی ادارے سپارکو کے مطابق محرم الحرام کا چاند 26 جون بروز جمعرات کو نظر آنے کا امکان ہے اور یکم محرم 1447 ہجری 27 جون کو متوقع ہے۔
ترجمان نے بتایا کہ نئے چاندکی پیدائش 25 جون کو سہ پہر 3:32 بجے ہوگی اور 26جون جمعرات کو غروب آفتاب کے وقت چاند کی عمر 28 گھنٹے،15 منٹ ہوگی جب کہ اور مطلع صاف ہونےکے باعث نیا چاند آسانی سے دیکھا جاسکےگا۔
ترجمان کے مطابق ملک کے ساحلی علاقوں میں غروب آفتاب اور چاند کے غروب ہونے کے درمیان وقفہ 75 منٹ ہوگا جو چاند کی رویت کے لیے بہترین حالات فراہم کرے گا۔
تاہم اگر چاند 26 جون کو نظر آجاتا ہے تو 9 محرم الحرام 5 جولائی بروز ہفتہ اور یوم عاشور 10 محرم 6 جولائی بروز اتوار کو ہوگا۔
مزید خبریں :
سندھ اسمبلی نے نئے مالی سال کا بجٹ منظور کرلیا
5 گھنٹے پہلے
