15 مارچ ، 2012 
پی پی قیادت کیخلاف سوئس اکاوٴنٹس سے متعلق درخواست خارج
15 مارچ ، 2012
اسلام آباد … سپریم کورٹ نے پیپلز پارٹی کی قیادت کے خلاف سوئس اکاوٴنٹس کے حوالے سے ایک درخواست خارج کردی ہے۔ چیف جسٹس پاکستان نے ریمارکس دیئے ہیں کہ سیاسی لوگوں کو بدنام نہ کریں اور بے بنیاد مقدمہ بازی بھی نہ کی جائے۔ ایک شہری ضیاء الدین انصاری نے 1997ء میں سپریم کورٹ میں درخواست دائر کی تھی کہ سوئس بینکوں میں پاکستان کے ایک کروڑ 20 لاکھ ڈالر موجود ہیں، واپس منگوائے جائیں۔ چیف جسٹس افتخارمحمد چوہدری کی سربراہی میں 3 رکنی بینچ نے مقدمہ کی سماعت کی۔ چیف جسٹس نے درخواست گزار وکیل سے کہاکہ این آر او عملدرآمد کیس میں عدالت پہلے ہی آرڈر کرچکی ہے، اس لیے اس کیس پر مزید زور نہ دیا جائے۔ درخواست گزار وکیل کا کہنا تھا کہ کیس کا تعلق کوٹیکنا سے بھی ہے۔ چیف جسٹس نے کہاکہ سیاسی لوگوں کو بدنام نہ کریں۔ بعد میں عدالت نے درخواست خارج کردی۔
مزید خبریں :
