کراچی…محمد رفیق مانگٹ…بھارتی اخبار”ٹائمز آف انڈیا اور دی ہندو “ کے مطابق بھارت میں پاکستانی خاندان کے پانچ افراد کو حراست میں لے لیا گیا۔کولام میں کاروناگاپ پالی پولیس نے انہیں درست سفری دستاویزات اور اجازت نامہ کے بغیر ٹرین میں سفر کرنے کے الزام میں گرفتار کیا۔بلوچستان سے تعلق رکھنے والا خاندان بھارت میں امرت پوری میں امرتن دمیائی جارہا تھا۔ گرفتار افراد میں46سالہ کشور کمار ،40سالہ سنگیتاکشور کمار (وارشا) اور ان کے تین بچے19سالہ نکھل،16سالہ سمرن اور13سالہ کیرتھی کے طور پر شناخت کیا گیا ہے ۔پولیس کے مطابق خاندان کے پاس ضروری سفری دستاویزات نہیں تھیں اورغیر ملکی رجسٹریشن ایکٹ کے مطابق حکام سے ضروری اجازت حاصل کرنے کی کوشش نہیں کی گئی۔پاکستانی خاندان کو مہاراشٹر میں تھین کے علاقے تک سفر کی اجازت تھی لیکن انہوں نے کولام اور امرت پوری تک سفر کرکے قانون کی خلاف ورزی کی۔سفارت خانے نے انہیں سنگیتا کے بھائی کو تھین میں ملنے تک اجازت دی تھی۔ایک دن قبل میتھ شہر میں پہنچ کر اس خاندان نے رہائش کے لئے حکام سے رابطہ کیا ۔مگر ضروری دستاویزات پیش کرنے میں ناکامی کے بعد حکام نے پولیس کو آگاہ کیا۔سٹی پولیس کمشنر دیبش بہار کا کہنا ہے کہ پاکستان خاندان کے خلاف کوئی الزامات نہیں، ویزا کی خلاف ورزی پر ان کے خلاف مقدمہ درج کیا گیا ہے۔انہیں اگلے دن عدالت میں پیش کیا جائے گا۔ یہ خاندان کئی سال قبل بھارت سے ہجرت کرکے پاکستان چلا گیا تھا۔اخبارہندو لکھتا ہے کہ حراست میں لیے گئے خاندان کا تعلق سندھ سے ہے۔پولیس آج (اتوار) کو ان افراد کو میجسٹریٹ کی عدالت میں پیش کرے گا،ان کا ملک چھوڑنے کا فیصلہ عدالت کرے گی ،ضابطے کے مطابق بھارت چھوڑنے کے نوٹس کے سات دن کے اند ر ملک کو چھوڑنا ضروری ہے۔