کراچی…پرانی سبزی منڈی کے قریب دھماکے میں 2افراد جاں بحق اور 21زخمی ہوگئے۔ تفصیلات کے مطابق پرانی سبزی منڈی میں شاہ ژوب ہوٹل کے قریب رہائش پذیر موچکو تھانے کے ایس ایچ او شفیق تنولی جیسے ہی اپنے گھر پہنچے اور اپنی گاڑی سے اترے کہ اچانک ہی قریب ایک موٹرسائیکل میں دھماکاہوگیا جس کے نتیجے میں 2افراد جاں بحق اور 21زخمی ہوگئے۔ دھماکے سے شفیق تنولی بھی زخمی ہوئے ہیں جنہیں ایک نجی اسپتال منتقل کیا گیا جبکہ دیگر زخمیوں کو جناح اسپتال منتقل کیا گیا ہے جن میں سے کئی کی حالت تشویشناک ہے۔ دھماکے سے شفیق تنولی کی گاڑی مکمل طور پر تباہ ہوگئی جبکہ ان کے گھر کو بھی نقصان پہنچا۔ ڈی آئی جی منیرشیخ کا کہنا ہے کہ ایس ایچ اوشفیق تنولی کوچوٹیں آئی ہیں، جبکہ شفیق تنولی نے ایس ایس پی فاروق اعوان کوبیان دیا ہے کہ دہشت گرد نے موٹرسائیکل میری گاڑی سے ٹکرائی، لگتا ہے مجھ پر خودکش حملہ کیا گیا۔اے آئی جی کراچی شاہد حیات نے اسپتال جاکر زخمی ایس ایچ او موچکو اور دیگر زخمیوں کی عیادت کی جس کے بعد شاہد حیات کا میڈیا سے کہنا تھا کہ شفیق تنولی اور زخمی پولیس اہلکاروں کی حالت خطرے سے باہر ہے۔ ان کا کہنا تھا کہ اس حملے سے ہمارے حوصلے پست نہیں ہوئے، جرائم پیشہ افراد کے خلاف کارروائی جاری رکھیں گے۔