کراچی …متحدہ قومی موومنٹ کی رابطہ کمیٹی کے رکن اور قومی اسمبلی میں پارٹی کے پارلیمانی لیڈر ڈاکٹر فاروق ستار نے کہا ہے کہ الطاف حسین نے کارکنان کوپیغام دیا ہے کہ بلدیاتی انتخابات میں بھر پورحصہ لیناہے،میرادورہ کافی طویل تھا،الطاف حسین سے مشورے بھی ہوئے ہیں۔انھوں نے ان خیالات کا اظہار اتوار کی شب لندن سے واپسی پر کراچی ائیرپورٹ پر میڈیا سے گفتگو کرتے ہوئے کیا ۔واضح رہے کہ وہ اس ماہ کے اوائل میں قائد تحریک الطاف حسین کی جانب سے مشاورت کے لیے طلب کرنے پر پارٹی کے دیگر رہنماؤں کے ساتھ لندن گئے تھے۔ڈاکٹر فاروق ستار نے مزید کہا کہ قائد تحریک نے ہم کہہ دیا ہے کہ ایک مرتبہ پھرعوام کی خدمت کاوقت آ گیاہے،انھوں نے کہا کہ عوام کے تعاون سے پاکستان کومضبوط کرناہے،بنیادی مسائل اورحقوق کیلیے بڑی تعدادمیں لوگ باہرنکلیں،عوام نے ثابت کردیا ہے کہ وہ دھاندلی کیخلاف سیسہ پلائی دیواربن جائیں گے،ایک سوال پر انھوں نے کہا کہ آرڈیننس کے ذریعے شہری اوردیہی علاقوں کوتقسیم کرنیکی سازش کی گئی ہے،انھوں نے کہا کہ کراچی سمیت سندھ کے اہم شہروں میں ایم کیوایم کے میئرہی جیتیں گے، قتل یامنی لانڈرنگ کیس کاکوئی مقدمہ درج نہیں ہوا،منی لانڈرنگ یاکسی اورکیس میں نہ ہی کسی کونامزدکیاگیا، ڈاکٹر فاروق ستار نے کہا کہ ایم کیوایم کیخلاف منفی پروپیگنڈاکیاجارہاہے، کوئی ایم کیوایم کوچھوڑکرنہیں جارہا،اگرکوئی ایم کیوایم سے جارہاہے تووہ بتاکراورچھٹی لیکرجارہاہے، ہمارے مینڈ یٹ کوہائی جیک کرنیکی سازش ہورہی ہے،لیکن عوام ایم کیوایم کوووٹ دیکرکامیاب کرائیں گے۔