لندن.......متحدہ قومی موومنٹ کے قائد الطاف حسین اور کورکمانڈر کراچی لیفٹننٹ جنرل سجاد غنی کے درمیان جمعہ کی شام ٹیلی فون پر گفتگو ہوئی جس میں کراچی میں جاری آپریشن کے حوالہ سے ایم کیوایم کی شکایات پر تفصیلی تبادلہ خیال کیا گیا۔ کورکمانڈر کراچی نے الطاف حسین کو یقین دلایا کہ آپریشن کو غیرجانبدار بنانے کیلئے ہرممکنہ قدم اٹھایا جائے گا اور اس حوالے سے سامنے آنے والی تمام شکایات کی بھرپورتحقیقات کی جائیں گی۔ گفتگو کے دوران ایک چھ رکنی کمیٹی کے قیام کا بھی فیصلہ کیا گیا جس میں آپریشن کرنے والے اداروں کے تین حکام اور ایم کیوایم کے تین اراکین شامل ہوں گے ۔ یہ کمیٹی تمام تر شکایات کا جائزہ لیکر ان کی تحقیق کرے گی اور جولوگ بھی قانون کی خلاف ورزی میں ملوث ہوں گے ان کے خلاف کارروائی کی جائے گی خواہ ان کا تعلق کسی سے بھی ہو۔ واضح رہے کہ الطاف حسین نے چیف آف آرمی اسٹاف جنرل راحیل شریف کو کراچی آپریشن کے حوالہ سے حقائق پر مبنی پہلا کھلا خط لکھنے کا فیصلہ کیا تھااور کہا تھا کہ وہ اس بارے میں مزید کھلے خطوط بھی تحریر کریں گے تاہم کورکمانڈر کراچی نے الطاف حسین کی شکایات کو ایک فرض شناس، غیرجانبدار اور دیانتدار افسر کی حیثیت سے سنا جس پر الطاف حسین نے چیف آف آرمی اسٹاف کو کھلے خط لکھنے کا فیصلہ مؤخر کردیا ہے ۔