کراچی…رفیق مانگٹ…روم میں 17سالہ لڑکے نے تھوکنے پر ایک پاکستانی کو موت کے گھاٹ اتار دیا ۔ اطالوی میڈیا کے مطابق اس بے گھر پاکستانی شخص کے مبینہ 17سالہ قاتل کو گرفتار کر لیا گیا ہے۔سویڈن کے اخبار ’’دی لوکل‘‘ نے اطالوی میڈیا Il Messaggero کے حوالے سے کہا کہ پاکستانی شہری کو تشدد سے جاں بحق کرنے کا واقعہ مشرقی روم کے ضلع Torpignattara میں پیش آیا۔مبینہ حملہ آور اسی علاقے کا رہائشی ہے۔ پولیس کو بیان دیتے ہوئے مبینہ حملہ آور نے کہاکہ گلی میں پاکستانی شہری نے اس پر تھوکا تھااورجس سے اس کی لڑائی ہونے کا دعویٰ کیا۔وہ گھر کی طرف جا رہا تھا جب اس نے دیکھا کہ ایک پاکستانی شراب کے نشے میں تھا اور راہگیروں کو پریشان کر رہا تھا۔ جب وہ اس کے پاس سے گزرا تو اس نے اس پر تھوکا جس پر اس نے ردعمل کیا۔تاہم حملہ آور نے ایک سے زائد گھونسہ مارنے کی تردید کی۔عینی شاہدین کے مطابق واقعے کے وقت حملہ آور اپنے ایک دوست کے ساتھ تھا لیکن اس نے حملے میں حصہ نہیں لیا۔ 28سالہ پاکستانی مقتول کی شناخت محمد شان زاد کے نام سے ہوئی ہے جو اٹلی میں بے گھر تھا تاہم اس کے پاس ایک اطالوی رہائشی اجازت نامہ تھا۔ قتل کی وجوہ معلوم کرنے کیلئے لاش کا پوسٹ مارٹم کیا جائے گا۔مبینہ حملہ آور کو بچوں کی جیل میں رکھا جائے گا اور اسے قتل کے ان الزامات کا سامنا کرنا پڑے گا جس میں قاتل کسی ارادی طور یہ جرم نہیں کرتا۔