28 فروری ، 2025 
شمالی وزیرستان میں سکیورٹی فورسز کی کارروائی، 6 خوارج ہلاک
28 فروری ، 2025
شمالی وزیرستان میں سکیورٹی فورسز کی کارروائی میں 6 خوارج ہلاک ہوگئے۔
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے غلام خان میں سکیورٹی فورسز نے خوارج کی موجودگی کی اطلاع پر انٹیلی جنس بیسد آپریشن کیا۔
آئی ایس پی آر نے بتایاکہ آپریشن کے دوران سکیورٹی اہلکاروں نے خوارج کے ٹھکانے کو مؤثر طریقے سے نشانہ بنایا جس کے نتیجے میں 6 خوارج مارے گئے۔
آئی ایس پی آر کے مطابق ہلاک خوارج کے قبضے سے اسلحہ اور گولہ بارود بھی برآمد ہوا، ہلاک خوارج سکیورٹی فورسز کے خلاف متعدد کارروائیوں کے ساتھ ساتھ بے گناہ شہریوں کے قتل میں بھی ملوث تھے۔
آئی ایس پی آر کا کہنا ہے کہ علاقے میں پائے جانے والے کسی ممکنہ خارجی کو ختم کرنے کے لیے سینیٹائزیشن آپریشن بھی کیا گیا، سکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔
دوسری جانب صدر مملکت آصف زرداری نے شمالی وزیرستان میں 6 دہشتگردوں کو ہلاک کرنے پر سکیورٹی فورسزکوخراج تحسین پیش کیا۔ صدر مملکت کا کہنا تھا کہ سکیورٹی فورسزدہشتگردی کے خاتمے کے لیے کارروائیاں کررہی ہیں، پوری قوم دہشتگردی کے خلاف متحد ہے۔
انہوں نے کہا کہ دہشتگردی کے مکمل خاتمے تک فتنہ الخوارج کےخلاف کارروائیاں جاری رہیں گی۔
