لندن… متحدہ قومی موومنٹ کے قائد الطاف حسین نے کہاہے کہ ہم عمران خان کو کراچی میں خوش آمدیدکہتے ہیں،وہ کراچی میں ایم کیوایم کے مہمان ہوں گے اورمیںانہیں جلسہ کی مبارکباد دیتا ہوں۔ انہوں نے یہ بات ہفتہ کی شب لندن میں اپنی 61ویں سالگرہ کے سلسلے میں ایم کیوایم یوکے کے زیراہتمام منعقد کئے جانے والے اجتماع سے وڈیولنک کے ذریعے خطاب کرتے ہوئے کہی،اس موقع پر برمنگھم، مانچسٹر، بریڈ فورڈ، شیفیلڈ، اوربیلجیئم کے کارکنوں نے بھی بڑی تعدادمیں شرکت کی ۔ اپنے خطاب میں الطاف حسین نے کہاکہ کراچی میں آنے والے ہمارے مہمان ہیں،عمران خان ہوں یانوازشریف یااسفندیارولی ہم سب کوخوش آمدید کہتے ہیں، کراچی بڑامہمان نوازہے اوراپنے دامن میں ہرایک کوسمیٹ لیتاہے، ایم کیوایم نے 1987ء میں ہی کراچی حیدرآباد کی بلدیات کے ایوانوں میں غریب ومتوسط طبقہ سے تعلق رکھنے والے افرادکوبھیج کرایک انقلاب برپاکیا اورقومی وصوبائی اسمبلیوں میں مڈل کلاس نوجوانوں کو جاگیرداروں اوروڈیروں کے برابربٹھایا،اس انقلاب کا دائرہ پورے پورے ملک میں پھیلانے اورملک سے فرسودہ جاگیردارانہ نظام کے خاتمہ کیلئے گزشتہ 37 برسوں سے ہم جدوجہدکررہے ہیں ، ہمیں خوشی ہے کہ آج وہ باتیں عمران خان اورڈاکٹرطاہرالقادری بھی کررہے ہیں۔ الطا ف حسین نے نئے صوبوںکے حوالے سے کہاکہ پاکستان میں نئے صوبوں کاقیام وقت کی ضرورت ہے ، سندھ میں صوبے کے قیام پر اگرسندھی قوم پرستوں کواعتراض ہے توسندھ کانام تبدیل کئے بغیریہاں صوبے بنائے جاسکتے ہیں، سندھ کوشمالی سندھ ،جنوبی سندھ اوروسطی سندھ نام د ے کرصوبے بنائے جاسکتے ہیںاس طرح سندھ میں صوبے بھی بن جائیں گے اورسندھ کانام بھی تبد یل نہیں ہوگا۔ اسی طرح سے پنجاب اورملک کے دیگرصوبوں میںبھی کیا جاسکتاہے۔انہوں نے کہاکہ اگرصوبے بنیں گے توچاروں صوبوں میں بنیں گے ورنہ نہیں بنیں گے، پاکستان کوبچاناہے تونئے صوبے بناناہوںگے۔ انہوںنے اسکاٹ لینڈ کی مثال دیتے ہوئے کہاکہ معاملہ ٹیبل پربیٹھ کرڈائیلاگ کے ذریعے حل کرلیا جائے ورنہ لوگ اپنے حقوق کیلئے بڑی سے بڑی قربانیاں دیتے ہیں۔انہوں نے کہاکہ 1973ء میںسندھ میں 10سال کیلئے کوٹہ سسٹم نافذ کیاگیاتھالیکن اس کی مدت میں توسیع کی جاتی رہی اوراب پھرکردی گئی ہے ۔ اگرسندھ ایک ہی ہے تو 40 اور 60 فیصد کاکوٹہ کیوں مقرر کیاگیا؟جب یہ تقسیم ہوگی تو سندھ میں نئے صوبے کی قیام کیلئے آوازیں تواٹھیں گی۔ الطا ف حسین کی اپیل پر اجتماع میں پاکستان کے سیلاب زدگان اورآئی ڈی پیز کی امداد کیلئے عطیات بھی جمع کئے گئے ۔ اس موقع پر ممتازمقامی فنکاروں نے اپنے فن کامظاہرہ کیا۔