لندن…متحدہ قومی موومنٹ کے قائد الطاف حسین نے رابطہ کمیٹی کوہدایت کی ہے کہ کراچی میں صحت وصفائی اورسماجی وفلاحی بہبودکے پروگرام شروع کئے جائیں۔ انہوںنے یہ ہدایتپیر کی شب رابطہ کمیٹی پاکستان کے ایک اجلاس سے خطاب کرتے ہوئے کہی۔ اجلاس میں شہرکی صحت وصفائی کی صورتحال ،بجلی کی چوری اورسماجی برائیوں کے بڑھتے ہوئے رجحان پر تفصیلی گفتگو کی گئی اوراس کے اسباب اورحل پر تفصیلی غور وخوص کیاگیا۔اجلاس سے خطاب کرتے ہوئے الطاف حسین نے کہاکہ ایک صحت مندمعاشرے کے قیام اور معاشرے کی اصلاح احوال کیلئے معاشرے سے سماجی برائیوں کے خاتمہ پرتوجہ دیناضروری ہے ۔ ہم بہت سے کام اپنی مددآپ کے تحت کرکے معاشرے کی اصلا ح کرسکتے ہیں اورشہریوںکی مددکرسکتے ہیں۔ انہوں نے رابطہ کمیٹی کوہدایت کی کہ وہ شہریوں کی بھلائی اورانہیں سہولیات کی فراہمی کیلئے ’’ اپنی مددآپ ‘‘ کے اصول کے تحت’’ ہفتہ ء صفائی ‘‘ اور’’ سستے پھلوں کے اسٹال‘‘ جیسے فلاحی پروگرام شروع کرنے کیلئے لائحہ عمل بنائیں۔ الطاف حسین نے کراچی اورسندھ کے دیگر شہروں میں نوجوانوں میںپان پراگ ،گٹکا،مین پوری جیسی مضرصحت چیزوں کے بڑھتے ہوئے استعمال پربھی سخت تشویش کااظہارکیااوررابطہ کمیٹی کوہدایت کی کہ وہ سماجی اصلاح اور فلاح وبہبود کے پروگرام میں اس معاملے کی روک تھام کیلئے بھی لائحہ عمل بنائیں ۔