20 اپریل ، 2012 
بلدیاتی الیکشن نہ ہونے کا ذمہ دار الیکشن کمیشن ہے،چیف جسٹس
20 اپریل ، 2012
اسلام آباد… سپریم کورٹ میں انتخابی اخراجات سے متعلق کیس کی سماعت جاری ہے جس کے دوران چیف جسٹس نے ریمارکس دیئے ہیں کہ الیکشن کمیشن ناکارہ اور ڈاکخانہ جیسا ادارہ ہے اور بلدیاتی الیکشن نہ ہونے کا ذمہ دار بھی الیکشن کمیشن ہے۔ چیف جسٹس کی سربراہی میں تین رکنی بنچ نے انتخابی اخراجات کیس کی سماعت کی ،عدالت نے ڈی جی الیکشن کمیشن شیر افگن کے نہ آنے پر اظہار برہمی کیا۔ چیف جسٹس نے ریمارکس دیئے کہ الیکشن کمیشن ایک ڈاکخانہ بنا بیٹھا ہو جو خود کچھ نہیں کرتا، یہ ناکارہ ادارہ ہے، اسکا احتساب ہونا چاہیئے، بلدیاتی الیکشن نہ ہونے کا ذمہ دار الیکشن کمیشن ہے، تین کروڑ سے زائد جعلی ووٹ نکلوائے مگر اب بھی ووٹر لسٹیں تیار نہیں ہوئیں، موجودہ قائمقام چیف الیکشن کمشنر جنگی بنیادوں پر کام کرکے لسٹیں مکمل کرارہے ہیں۔ اس موقع پر جسٹس طارق پرویز نے ریمارکس دیئے کہ الیکشن کمیشن آزاد ادارہ نہیں، حیران کن بات ہے کہ اس کا اور وفاق کا موقف الگ ہے لیکن اس کیس میں دونوں کا ایک ہی وکیل ہے۔
