دہلی…انڈین پریمیئر لیگ میں جمعہ کو کھیلے جانے والے واحد میچ میں دہلی ڈیئر ڈیولز نے ممبئی انڈینز کو 37رنز سے ہرادیا۔اس سے قبل ممبئی کے کپتان ھربھجن سنگھ نے دہلی کے فیروز شاہ کوٹلہ گراؤنڈ پر ہونے والے اس میچ کا ٹاس جیت کر دہلی کو بیٹنگ کی دعوت دی ،جس کا دہلی کی ٹیم نے بھرپور فائدہ اٹھایا اور اپنے مقررہ بیس اوورز میں پانچ وکٹوں کے نقصان پر 207رنز بنائے، جس میں کپتان سہواگ کے شاندار 73کے علاوہ مہیلا جے وردنے 55اور پیٹرسن 50کے قابل ذکر بیٹسمین تھے۔ممبئی کی جانب سے رابن پیٹرسن نے تین جبکہ مالنگا نے دو وکٹ حاصل کیے ۔جواب میں ممبئی کی ٹیم زیادہ دیر دہلی کے بولروں کا سامنا نہ کرسکی ،سوائے ریو دو62اور دنیش کارتھک40کے کوئی اور بیٹسمین وکٹ پر ٹک نہ سکا۔یوں ممبئی کی ٹیم اپنے مقررہ بیس اوورز میں نو وکٹوں کے نقصان پر170تک محدود رہی۔دہلی کی جانب سے پیٹرسن، شہباز ندیم اور یادو نے دو دو جبکہ مورکل اور اگرکار نے ایک ایک وکٹ حاصل کی۔واضح رہے کہ یہ میچ جیو سوپر نے دہلی کے فیروز شاہ کوٹلہ گراؤنڈ سے براہ راست نشر کیا۔