21 اپریل ، 2025 
امید ہے لاہورکا وینیو کوئٹہ گلیڈی ایٹرز کیلئے خوش قسمتی لائےگا: ویوین رچرڈز
21 اپریل ، 2025
لاہور: کوئٹہ گلیڈی ایٹرز کے مینٹور اور ویسٹ انڈیز کے لیجنڈری کرکٹر سر ویوین رچرڈز نے ٹیم کی حالیہ کارکردگی کے باوجود مکمل اعتماد کا اظہار کیا ہے اور کہا ہے کہ انہیں امید ہےکہ لاہور کا وینیو ہمارے لیے خوش قسمتی لائےگا۔
لاہور میں میڈیا سے گفتگو کرتے ہوئے ویوین رچرڈز کا کہنا تھا کہ کوئٹہ گلیڈی ایٹرزنے اپنے گزشتہ دونوں میچز میں اچھی کارکردگی نہیں دکھائی اور اس طرح نہیں کھیلی جیسی وہ کھیل سکتی ہے۔
ان کا کہنا تھا کہ لاہور کی نئی کنڈیشنز ہیں، ہمیں علم ہے کہ ہم بہتر کھیل سکتے ہیں،امید ہےکہ لاہور کا وینیو ہمارے لیے خوش قسمتی لائےگا۔
انہوں نے مارک چیپمین کی ٹیم میں شمولیت کو خوش آئند قرار دیا اور کہا کہ مارک چیپمین ہمارے اسکواڈ میں آیا ہے، وہ نیوزی لینڈ کے لیے بہت اچھا کھیل چکا ہے اور یہاں بھی پرفارم کرنے کی بھرپور صلاحیت رکھتا ہے۔
ویوین رچرڈز کا کہنا تھا کہ آپ جتنی مرضی اچھی ٹیم ہوں، کبھی کبھار ہار کا سامنا کرنا پڑتا ہے، ہم ابھی گرے ہوئے ہیں، لیکن آؤٹ نہیں ہیں، مجھے یقین ہے کہ ہم آگے جا کر بہتر کریں گے۔
پاکستان سے محبت کا اظہار کرتے ہوئے رچرڈز نے کہا پاکستان میرا دوسرا گھر ہے، میں کئی برسوں سے یہاں آ رہا ہوں، ویسٹ انڈیز ٹیم کے ساتھ بھی آ چکا ہوں، مجھے یہاں آنا بہت اچھا لگتا ہے، کرکٹ جہاں لے کر جائے میں خوش ہوں۔
رچرڈز نے کپتان سعود شکیل کے حوالے سے افواہوں کی تردید کی اور کہا کہ سعود شکیل کی کپتانی سے کوئی مسئلہ نہیں، وہ اس وقت اچھا پرفارم کر رہا ہے، اختتام پر ہم فیصلہ کریں گے کہ وہ کیسا کپتان ہے۔
مزید خبریں :
پشاور زلمی پی ایس ایل 10 میں کافی مضبوط ٹیم ہے: بابر اعظم
21 اپریل ، 2025
ٹورنامنٹ کا بہترین بولر بننا چاہتا ہوں: حسن علی
21 اپریل ، 2025
جان سینا ریکارڈ 17 ویں بار ڈبلیو ڈبلیو ای چیمپئن بن گئے
21 اپریل ، 2025
