لندن......لندن سے داعش میں شمولیت کے لیئے شام جانے والی طالبات کا تاحال سراغ نہ مل سکا، طالبات کے اقدام نے برطانوی سیکیورٹی اداروں کی کارکردگی پر سوالیہ نشان لگا دیا ہے، برطانوی پولیس کے مطابق 15 سالہ شمیمہ بیگم، 16 سالہ قدیضہ سلطانہ اور 15 سالہ عامرہ عباسی منگل کو شدت پسند تنظیم داعش میں شمولیت اختیار کرنے لندن سے استنبول کے لیے روانہ ہوئی تھیں، تینوں طالبات کی تلاش کے لیے ہنگامی اپیل میں پولیس کا کہنا ہے کہ دہشت گرد تنظیم سے تینوں طالبات کو انتہائی سنگین خطرات لاحق ہیں، دوسری طرف والدین کی جانب سے برطانوی سیکیورٹی ایجنسیز کو شدید تنقید کا نشانہ بناتے ہوئے کہا گیا ہے کہ گزشتہ برس اسی اسکول کی اقصٰی محمود کے شام جانے کے واقعے کے بعد مزید تین برطانوی لڑکیوں کی شام روانگی پر برطانوی سکیورٹی ایجنسیاں جواب دہ ہیں، ادھر برطانیہ کے وزیراعظم ڈیوڈ کیمرون نے اپنے بیان میں کہا ہے دہشت گردی کے خلاف جنگ صرف پولیس اور سرحدی فورس کے ساتھ مل کر نہیں لڑی جا سکتی اس کے لیے معاشرے اور تعلیمی اداروں کو بھی اپنا کردار ادا کرنا ہوگا۔