کراچی......متحدہ قومی موومنٹ کے این اے 246کی نشست پر نامزد امیدوار کنور نوید جمیل ایڈووکیٹ نے کہا ہے کہ ایم کیوایم نے ہمیشہ سیاست میں جمہوری اصولوں کو اولین ترجیح دی ہے اور چاہتی ہے کہ ملک بھر میں انتخابات کے موقع پر دیگر سیاسی جماعتیں بھی جمہوریت کے اصولوں کو اپنائیں اور ملک میں مثبت جمہوری سیاست کو فروغ دیں ۔ ان خیالات کااظہار انہوں نے این اے 246کی نشست پر ہونے والے ضمنی انتخابات کے سلسلے میں گلبر گ بلاک 12، افشاں پارک ، محمد ی کالونی اور حسین آباد میں انتخابی کارنر میٹنگوں کے شرکاء سے خطاب کرتے ہوئے کیا ۔کارنر میٹنگوں میں علاقوں کے نوجوانوں، بزرگوں ، خواتین نے مجموعی طو رپر ہزارو ںکی تعداد میں شرکت کی اور حق پرست امیدوار کنور نوید جمیل کی ضمنی انتخاب میں کامیابی کے حق میں زبردست نعرے لگائے ۔ اس موقع پر ایم کیوایم کی رابطہ کمیٹی کے ارکان حیدر عباس رضوی ، عارف خان ایڈووکیٹ ، قومی اسمبلی میں ایم کیوایم کے پارلیمانی لیڈر رشید گوڈیل ، حق پرست اراکین سندھ اسمبلی عبد الرزاق ، عامر معین ، حاجی انور رضا اور جمال احمد نے کارنر میٹنگز کے شرکاء سے خطاب کیا ۔ کنور نوید جمیل نے کہاکہ الطاف حسین نے ملک کی سیاست میں ہمیشہ فراخدلی اور بڑے پن کا مظاہرہ کیا ہے اور یہی ایک عظیم قائد کی نشانی ہے ۔الطاف حسین نے عمران خان کاجناح گرائونڈمیں شاندار استقبال کرکے اس بات کا ثبو ت دیا ہے۔ انہوں نے کہاکہ ضمنی الیکشن برائے این اے 246میں ایم کیوایم کی جیت یقینی ہے اور مخالفین نے اس سے قبل بھی بڑے اتحاد کرکے الیکشن لڑا ہے لیکن سب جماعتوں پر مشتمل یہ انتخابی اتحاد بھی ایم کیوایم کے امیدوار کو این اے 246کی نشست سے شاندار کامیابی سے نہیں روک سکا ہے۔ شرکاء سے خطاب کرتے ہوئے رابطہ کمیٹی کے ارکان حیدر عباس رضوی اور عارف خان ایڈووکیٹ نے اپیل کی کہ عوام 23، اپریل کو اپنا قیمتی ووٹ حق پرست امیدوار کنور نوید جمیل کے حق میں استعمال کریں ۔دریں اثنا ایم کیو ایم کی رابطہ کمیٹی نے سرجانی ٹائون کے شہید کارکن سید ذوالفقار حیدکی بیوہ شازیہ ذوالفقار اور سانگھڑ زون یونٹ لنڈو کی یونٹ کمیٹی کے رکن انور علی راجوپت کے بھائی محمد اکرم کے انتقال پر گہرے دکھ اور افسوس کااظہا رکیا ہے ۔اور دعا کی کہ اللہ تعالیٰ مرحومین کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے۔ (آمین)۔