کراچی.......ثانوی تعلیمی بورڈ کے تحت جاری سالانہ امتحانات 2015ء کے بارہویں روز آج صبح کی شفٹ میں کیمسٹری جماعت دہم ناکام امیدواروں کیلئے جبکہ دوپہر کی شفٹ میں بریل، عربی،فارسی اور حسابات خانہ داری اور متعلقہ مسائل کے پرچے منعقد ہوئے۔اس موقع پر چیئرمین میٹرک بورڈ فصیح الدین خان اور ناظم امتحانات نعمان احسن نے الگ الگ مختلف امتحانی مراکز کے دورے کئے۔ چیئرمین میٹرک بورڈ فصیح الدین خان نے فرحانہ گورنمنٹ گرلز سیکنڈری اسکول ناظم آباد اور وسیم گورنمنٹ گرلز سیکنڈری اسکول ناظم آبا د کا دورہ کیا جہاں طالبات پرسکون ماحول میں امتحانات دے رہی تھیں جبکہ چلڈرن اکیڈمی GBSSناظم آباد کے دورے کے دوران ایک جعلی امیدوار سمیت 2طلباء نقل کرتے پکڑے گئے۔ دوسری جانب ناظم امتحانات نعمان احسن نے الرحمٰن سیکنڈری اسکول گلشن ضیاء اورنگی ٹائون سے 2طالبات کو نقل کرتے ہوئے پکڑا اور ان کو امتحانات دینے سے روک دیا۔ چئیرمین میٹرک بورڈ فصیح الدین خان نے کہا کہ نقل کا خاتمہ ہماری مشترکہ جدوجہد ہے۔ انھوں نے مزید کہا کہ میڈیا اور سول سوسائٹی ایسے اسکولوں کی نشاندہی کریں جہاں نقل جیسے ناسور کو پروان چڑھایا جارہا ہے اور ایسے اسکولوں کی بھی نشاندہی کریں جو نقل کے خاتمے میں مثبت کردار ادا کررہے ہیں۔ سیکریٹری بورڈ مسز حور مظہر نے اپنے ایک بیان میں کہا کہ اگر اساتذہ ایمانداری سے اپنی ذمہ داری پوری کریں اور فرائض انجام دیں تو نقل مافیا کی کمر ٹوٹ سکتی ہے۔ ناظم امتحانات نعمان احسن نے سینٹر کنٹرول آفیسرز اور سینٹر سپرنٹنڈنٹس کو ہدایت جاری کرتے ہوئے کہا کہ وہ امتحانی مراکز پر اپنی ذمہ داری محنت اور ایمانداری سے انجام دیں اور نگراں کمرہ امتحان پر کڑی نظر رکھتے ہوئے نقل کی روک تھام کو یقینی بنائیں۔