کراچی.......این اے 246کی نشست پر ہونے والے ضمنی الیکشن میں نامزد متحدہ قومی موومنٹ کے امیدوار کنور نویدجمیل کی ملک بھر سے تعلق رکھنے والی 10شیعہ تنظیموں نے مکمل حمایت کا اعلان کیا ہے اور تمام اہل تشیع حضرات ُ سے اپیل کی ہے کہ وہ 23،اپریل کے ضمنی الیکشن میں حق پرست امیدوار کنور نوید جمیل کو بھاری اکثریت سے ووٹ دیکر کامیاب کرائیں ۔ حمایت کا اعلان کرنے والی شیعہ تنظیموں میں تنظیم عزاداری پاکستان ، تنظیم عزا پاکستان ، تحریک نفاذ فقہ جعفریہ ، شیعہ فیڈریشن ، جعفریہ الائنس ، انجمن ذاکرین امامیہ ، انجمن ذاکرین ِ محمد و آل محمد ، ادارہ دین و دانش آل محمد ، پاکستان شیعہ کونسل اور ادارہ تبلیغات اسلامی شامل ہیں ۔ ایم کیوایم کے این اے 246کی نشست پرنامزد حق پرست امیدوار کنور نوید جمیل ایڈووکیٹ کی حمایت کا اعلان شیعہ تنظیموں کے رہنمائوں علامہ زوہیر عباس عابدی ، علامہ اطہر مشہدی ، علامہ سید علی کرار نقوی ، علامہ نواب حیدر عابدی ، علامہ قلب جعفر بلگرامی ، علامہ عباس جعفری ، علامہ سید محسن کاظمی ، علامہ توفیق نجفی ، علامہ حسن رضا رضوی ، ایس ایم نقی ، شمس الحسن شمسی اور سید ابرارحسن رضوی نےعزیز آباد میں پرہجوم پریس کانفرنس سے خطاب کرتے ہوئے کیا ۔چیئرمین پاکستان شیعہ کونسل و ادارہ دین و دانش علامہ زوہیر عابدی نے کہا کہ ہم ماضی کی طرح اپنے عہد پر قائم رہتے ہوئے ایک نظریہ کی حمایت کرنے کیلئے اور اسے اپنی قوم تک پہنچانے کیلئے یہاں جمع ہوئے ہیں ، ہم پہلے بھی متحدہ قومی موومنٹ کی حمایت اس لئے کرتے رہے ہیں کہ اس شہر میں اس ملک میں ایم کیوایم وہ واحد جماعت ہے جس نے کم از کم دو کام ایسے کئے جو کسی جماعت نے کرنے کا سوچا بھی نہیں ہے اور ان دو کاموں میں ایک کام امت مسلمہ کے بکھرے ہوئے تمام فرقوںکو جمع کرنااور مسلمانوں کو لڑانے کی سامراجی سازشوں کو ختم کرنے میں اپنا اہم کردار اداکرنا ہے جبکہ دوسراکام دہشت گردوں کے خلاف اعلان جہاد ہے ۔ انہوں نے کہا کہ سامراجی دشمنوں نے ملت مسلمہ کے لوگوں کوفرقہ وارایت کے نام پربانٹ دیا تھا جبکہ امت مسلمہ کے تمام بکھرے ہوئے فرقوں کو جمع کرنے کا سہرا الطاف حسین کے سر جاتا ہے ، فرقہ واریت کے نام پر اس خونریزی کو الطاف حسین اور ان کے ساتھ کام کرنے والوں نے روکا،بہت سی ایسی جماعتیں ہیں جو یہ دعویٰ کرتی ہیں کہ ہم دہشت گردی کے خلاف ہیں لیکن دہشت گرد انہی کی گودوں میں پل رہے ہوتے ہیں ۔ ابھی ملک میں الیکشن کے دوران ایک جماعت نے جیتنے کے بعد دہشت گرد جماعت کا شکریہ اداکیا اور ان کے ساتھ گروپ فوٹو بنوایا ۔ انہوں نے کہا کہ الطاف حسین کے نامزد امیدور کنور نوید کو حلقہ این اے 246کی نشست پر کامیاب کرایاجائے تاکہ شہر سے فرقہ واریت ختم ہواو رحقیقی معنوں میں دہشت گردی کے خلاف جنگ لڑی جاسکے ۔ انہوںنے واضح طو رپر کہا کہ شیعہ کمیونٹی سب کچھ کرسکتی ہے لیکن طالبان ، داعش جیسی دہشت گرد تنظیموں کی حمایت کبھی نہیں کرسکتی ۔ جو طالبان اور داعش کی ذہنیت رکھنے والوں کی حمایت کر رہے ہیں وہ ہم میں سے نہیں ہیں،ہماری طالبان ،د اعش اور ظالموں سے دشمنی چودہ سو سال پرانی ہے ہم اس ظلم کے حامیوں سے اتحاد نہیں کرسکتے ۔