کراچی … متحدہ قومی موومنٹ کی رابطہ کمیٹی کے ڈپٹی کنوینر و حق پرست وفاقی وزیر ڈاکٹر فاروق ستار نے کہا ہے کہ کراچی میں رہنے والے پختون سمیت دیگر قومیتوں کے افراد ایم کیوایم کے ساتھ ہیں اور وہ شہر کا امن تباہ کرنے کیلئے کی جانے والی گھناوٴنی سازشوں کے پیچھے کار فرما عناصر کے مفادات کو اچھی طرح جانتے ہیں۔ لال قلعہ گراوٴنڈ عزیز آباد میں ایم کیوایم پختون آرگنائزنگ کمیٹی کے زیر اہتمام منعقدہ جنرل ورکرز اجلاس سے خطاب کرتے ہوئے ڈاکٹر فاروق ستار نے کہا کہ کراچی ملک کا معاشی حب ہے اور یہاں رہنے والی تمام قومیتیں شروع دن سے ہی پیار، محبت اور بھائی چارے سے رہ رہی ہیں لیکن بعض مفاد پرست عناصر جنہیں صرف اپنے ذاتی مفادات سے غرض ہے وہ اپنے مذموم عزائم کی تکمیل کیلئے مختلف قومیتوں کے درمیان نفرتیں پیدا کررہے ہیں جو ملک و قوم کیلئے کسی طرح بھی سود مند ثابت نہیں ہوسکتا۔ انہوں نے کہاکہ نفرتیں پیدا کرنے والے کبھی بھی کسی سے مخلص نہیں ہوسکتے اور ان کے مقاصد میں امن، آشتی کے بجائے خون خرابہ اور قتل و غارتگری شامل ہوتی ہے۔ انہوں نے کہاکہ الطاف حسین کا فکر وفلسفہ اور نظریہ مظلوم عوام کیلئے ہے اور مظلوم عوام ملک میں پائی جانے والی ہر قومیت میں موجود ہیں اور اب ہر قومیت کے مظلوم اپنے حقوق کے حصول کیلئے قائد تحریک جناب الطا ف حسین کو ہی اپنا نجات دہندہ تسلیم کررہے ہیں اور بڑی تعداد میں ایم کیوایم میں شمولیت اختیار کررہے ہیں۔