22 مئی ، 2015 
ممبئی: مسلمان نوجوان کو نوکری دینے سے انکار کردیا
22 مئی ، 2015
ممبئی......آئی این پی......بھارت میں ہندو انتہا پسندوں کی مسلم دشمنی ایک بار پھر کھل کر سامنے آگئی۔ ممبئی شہر کی ایک بڑی کمپنی نے نوجوان کو مسلمان ہونے پر نوکری دینے سے انکار کردیا۔ عالمی میڈیا رپورٹس کے مطابق ممبئی شہر میں 23سالہ ذیشان علی خان نے ہرے کرشنا ایکسپورٹ نامی زیورات برآمد کرنے والی کمپنی میں نوکری کے حصول کے لیے درخواست دی تھی، تاہم15 منٹ کے اندر ہی کمپنی کی جانب سے جوابی ای میل موصول ہوا، جس میں کہا گیا تھا کہ ہم صرف غیر مسلموں کو نوکری پر رکھتے ہیں۔ ذیشان کے ہم جماعتی مکنڈ مانی اور اومکار بنسودے نے بھی اسی کمپنی کو نوکری کی درخواست دی تھی، جنہیں دوسرے دن ہی انٹرویو کے لیے بلا لیا گیا تھا۔ ذیشان علی کا کہنا تھا کہ نوکری نہ دیئے جانے پر میں حیران تھا، میں نے ای میل کا اسکرین شاٹ لیا اور سوشل میڈیا پر پوسٹ کردیا۔ ملک بھر سے سماجی کارکن مجھے کہہ رہے ہیں کہ مجھے کیس فائل کرنا چاہیے۔ ذیشان کے اسکرین شاٹس کو ٹوئٹر اور فیس بک پر متعدد افراد نے شیئر کیا۔
