پیرس..... ر ضا چوہدری...... پاکستان دہشت گردی کے خلاف حالت جنگ میں ہے اور ہم پاکستان آرمی کے شانہ بشانہ کھڑے ہیں۔ پاکستان اوورسیز انٹرنیشنل لائرز فورم کے سینئر رہنما ایڈووکیٹ محمد ندیم یوسف کسانہ نے نمائندہ جنگ سے خصوصی گفتگو میں عاصمہ جہانگیر کے بیان پرردعمل کا اظہار کرتے ہوئے کہا کہ پاکستان آرمی اس وقت عالمی دہشت گردی کے خلاف ایک بہت بڑی جنگ لڑ رہی ہے. دہشت گردی کی اس جنگ میں پاکستانی عوام و سیکورٹی فورسز کے ہزاروں جوان جام شہادت نوش کر چکے ہیں اور ابھی یہ جنگ جاری ہے، پاکستان کو دشمنوں کی جانب سے مسلط کردہ دہشت گردی کی اس جنگ میں ہر قیمت پر کامیابی حاصل کرنی ہے۔ انہوں نےکہا کہ وہ دہشت گردوں کو سخت سے سخت سزا دینے کے لیے خصوصی عدالتوں کو مکمل اختیارات دینے کی حمایت کرتے ہیں، قوموں کو برے حالات کا سامنا کرنا پڑتا ہے، جس کے لیے سخت ترین فیصلے کرنے پڑتے ہیں،اس کے لیے ہم دہشت گردوں کے خلاف فوجی عدالتوں کے قیام کی حمایت کرتے ہیں۔انہوں نے کہا کہ دشمنوں کو یہ واضح پیغام ہے کہ پاکستانی عوام اپنی افواج کے ساتھ مل کر عالمی دہشت گردی کے خلاف پوری طرح سے متحد ہیں۔