کراچی .......متحدہ قومی موومنٹ کے فلاحی ادارے خدمت خلق فائونڈیشن کے زیراہتمام شاہ فیصل کالونی نمبر 2میں واقع کارڈیک ایمرجنسی سینٹر میں فارمیسی اور لیبارٹری سینٹر کا افتتاح کردیا گیا ۔ سینٹر کا افتتاح ایم کیوایم کی رابطہ کمیٹی کے ارکان شبیر احمد قائم خانی، امین الحق اور خدمت خلق فائونڈیشن کے چیف ٹرسٹی ڈاکٹر نصرت شوکت نے کیا ۔تقریب میں سینیٹر عبد الحسیب خان ، نشاط ضیاء قادری ، ارشد وہرااور علاقے کے عوام اورمعززین نے بڑی تعداد میں شرکت کی ۔ شرکاء سے خطاب کرتے ہوئے رابطہ کمیٹی کے رکن شبیر احمد قائم خانی نے کہا کہ خدمت خلق فائونڈیشن فلاحی سرگرمیوں کا فعال ترین ادارہ ہے اور اپنے قیام سے لیکر اب تک دکھی انسانیت کی بلاتفریق اور بے لوث خدمت کرتا چلا آرہا ہے ، الطاف حسین خدمت خلق فائونڈیشن کا قیام خالصتاً دکھی انسانیت کی خدمت کے تحت عمل میں لے کر آئے ہیں اور اس ادارے کے تحت غریب بچیوں کی شادیوں کے لئے جہیز کا انتظام ،غربا ء و مساکین کی امداد کا سلسلہ سال بھر جاری رہتا ہے جس سے ہزاروں افراد مستفید ہوتے ہیں ۔ رکن رابطہ کمیٹی امین الحق نے کہاکہ آج ایک مرتبہ پھر خدمت خلق فائونڈیشن کے زیراہتمام شاہ فیصل کالونی میں عوام کی بلا تفریق خدمت کیلئے لیبارٹری اور فارمیسی کا افتتاح کیا گیا ہے اور لوگوں کوعلاج و معالجہ کی سہولیات میں آسانیاں فراہم کی گئی ہیں ۔ الطاف حسین کی قیادت میں ایم کیوایم واحد سیاسی جماعت ہے جو عوامی مسائل کے حل کیلئے کوشاں ہے اور فلاحی سرگرمیوں میں بڑھ چڑھ کر حصہ لیتی ہے، خدمت خلق فائونڈیشن کے تحت فارمیسی اور لیبارٹری سینٹر کا افتتاح شاہ فیصل کالونی کے عوام کیلئے تحفہ ہے اور میری دعا ہے کہ خدمت خلق فائونڈیشن دکھی انسانیت کی خدمت کیلئے ہمیشہ اسی طرح پیش پیش رہے ۔ افتتاحی تقریب سے سینیٹر عبد الحسیب خان ، نشاط ضیاء قادری اور ارشد وہرا نے بھی خطاب کیا ۔