ہرارے......تیسرے اور فیصلہ کن ون ڈے انٹرنیشنل میں پاکستان نے زمبابوے کے خلاف ٹاس جیت کر فیلڈنگ کا فیصلہ کیا ہے، آج کے میچ میں اظہر علی پیر میں انفیکشن کے باعث نہیں کھیل رہے ، ان کی جگہ سرفراز احمد ٹیم کی قیادت کررہے ہیں۔

زمبابوے نے پاکستان کے خلاف دوسرا ون ڈے انٹرنیشنل ڈک ورتھ لوئس قانون کے تحت پانچ رنز سے جیت لیا تھا، اس کے ساتھ ہی سیریز بھی برابر ہوگئی تھی اور اب فاتح ٹیم کا فیصلہ تیسرے اور آخری ون ڈے میں ہوگا۔ پہلے ون ڈے میں پاکستان نے131رنز سے کامیابی حاصل کی تھی۔

زمبابوے نے بنگلہ دیش کے علاوہ صف اول کی ٹیسٹ کھیلنے والی ٹیموں کے خلاف آخری ون ڈے سیریز 14سال قبل جیتی تھی، جب 2000-2001 میں زمبابوے نے نیوزی لینڈ کو دو ایک سے شکست دی تھی۔ اس کے بعد اس کی زیادہ تر فتوحات بنگلہ دیش،کینیا آئر لینڈ اور چھوٹی ٹیموں کے خلاف رہیں، اب پاکستان کے خلاف اس کے پاس جیت کے لئے سنہری موقع ہے۔

پاکستان نے زمبابوے کے خلاف دس ون ڈے سیریز جیتی ہیں۔ 1995میں دونوں ٹیموں کے درمیان ون ڈے سیریز ایک ایک سے برابر رہی تھی۔زمبابوے نے پاکستان کے خلاف کبھی ون ڈے سیریز نہیں جیتی ہے۔