کراچی…کراچی میں فائرنگ اوردیگر مختلف واقعات میں جاں بحق افراد کی تعداد تین بچوں اورخاتون سمیت11 ہو گئی ہے جبکہ32سے زائد زخمی ہوگئے ہیں، فائرنگ سے زخمیوں ہونے والوں میں پولیس اہلکاربھی شامل ہے ۔اب تک 10گاڑیوں،درجنوں موٹر سائیکلوں اور پان منڈی کے قریب متعدد دوکانوں کو نذر آتش کر دیا گیا ،فائرنگ سے جاں بحق افراد کے لواحقین لاشیں لینے اسپتال پہنچنا شروع ہوگئے ہیں۔ نمائندہ جیو نیوزکے مطابق نجی ٹی وی کے رپورٹر اسلم خان اور کیمرہ مین بھی زخمیوں میں شامل ہیں ۔ کراچی کے علاقے بولٹن مارکیٹ اوراولڈسٹی کے مختلف علاقوں میں فائرنگ کے بعددکانیں بند ہوگئیں،پولیس کے مطابق نامعلوم افراد نے بولٹن مارکیٹ اوراولڈسٹی ایریامیں فائرنگ کر دی جس کے بعد وہاں بھگدڑمچ گئی اور دُکانیں بند ہوگئیں،اسپتال ذرائع نے خاتون سمیت9لاشیں اسپتال لائے جانے کی تصدیق کی ہے جبکہ مزید افراد دوران علاج جاں بحق ہو گئے،زخمیوں میں شدید زخمی بھی موجود ہیں اورخدشہ ظاہر کیا جارہا ہے کہ ہلاکتوں میں اضافہ ہو سکتا ہے ۔فائرنگ اور خوف وہراس کی وجہ سے میڈیسن کی ہول سیل مارکیٹ بھی بند ہو گئی جبکہ صرافہ بازارکے اطراف فائرنگ سے خوف وہراس پھیل گیا۔دوسری جانب ترجمان عوامی تحریک کے مطابق فائرنگ سے سندھ محبت ریلی میں شریک کئی خواتین زخمی ہوئیں۔