دبئی........متحدہ عرب امارات کے نائب صدر، وزیر اعظم اور حاکم دبئی شیخ محمد بن راشد المکتوم نے اپنے ملک کے دورے پر آئے ہوئے مصری صدر عبدالفتاح السیسی کو اپنی گاڑی میں دبئی کی سیر کروائی۔

مصری صدر کے ترجمان علا یوسف نے بتایا کہ شیخ راشد نے مصری مہمان کو دبئی کی سیر کرائی اور انہیں مشرق وسطیٰ کے اہم تجارتی اور سیاحتی مرکز میں ہونے والے ترقیاتی کام اور مختلف اہم جگہیں دکھائیں۔

علا یوسف کا مزید کہنا تھا السیسی اور شیخ راشد نے قبل ازیں ہونے والی ملاقات میں دوطرفہ تعلقات اور علاقائی پیش رفت پر تبادلہ خیال کیا،ملاقات میں شیخ راشد نے عرب دنیا میں مصر کے کردار کی اہمیت کا ذکر کرتے ہوئے کہا کہ مصر تمام عربوں کا حامی ہے۔

دریں اثناء جنرل السیسی کا کہنا تھا کہ دونوں ملکوں کے درمیان تعلقات خصوصیت کے حامل ہیں اور ایسے متعدد عوامل ہم دونوں کو مضبوط رشتے میں جوڑے ہوِئے ہیں، ان میں سب سے بڑا عنصر امارات میں کثیر تعداد میں مصری کیمونٹی کی موجودگی ہے جہاں وہ یو اے ای کی ترقی میں اپنا کردار ادا کر رہے ہیں۔