پی ایس ایل 10: کراچی میں میچز کے دوران شائقین کی کم حاضری پر ٹم سائفرٹ کا مایوسی کا اظہار

کراچی: پی ایس ایل ٹیم کراچی کنگز میں شامل نیوزی لینڈ کے وکٹ کیپر بیٹر ٹم سائفرٹ نے پاکستان سپر لیگ کے کراچی میں میچز کے دوران شائقین کی گراونڈ میں کم حاضری پر مایوسی کا اظہار کیا ہے۔

کراچی میں جیوز نیوز سے گفتگو کرتے ہوئے ٹم سائفرٹ نے کہا کہ پاکستان سپر لیگ کا معیار زبردست ہے، ہر ٹیم ایک مضبوط حریف ہے جس سے مقابلہ اچھا ہوتا ہے لیکن ایک چیز کی کمی ہے وہ ہے کراچی میں کراؤڈ کی، اس کو بہتر کرنا ضروری ہے، امید ہے اگلے میچز میں فینز ہماری سپورٹ کیلئے گراونڈ میں آئیں گے۔ 

انہوں نے کہا کہ جب ٹیمیں ہوم میچز کھیلتی ہیں تو ان کی خواہش ہوتی ہے کہ ہوم ٹیم بھرپور انداز میں اس کی سپورٹ کرے ۔

ایک سوال پر ٹم سائفرٹ نے کہا کہ پاکستان سپر لیگ کو جو چیز دوسری لیگز سے مختف بناتی ہے وہ اس کا فاسٹ بولنگ ٹیلنٹ ہے، ہر ٹیم کے پاس زبردست نوجوان فاسٹ بولنگ ٹیلنٹ موجود ہے۔

کیوی کرکٹر کا کہنا تھا کہ فرنچائز لیگ میں وہ انفرادی اعداد و شمار کے بجائے ٹیم کی فتح میں کردار ادا کرنے پر زیادہ توجہ دیتے ہیں، انہوں نے کہا کہ ان کے لئے پی ایس ایل کا آغاز اچھا رہا ہے اور امید ہے کہ اس سلسلے کو جاری رکھا جائے گا۔

ایک سوال پر ان کا کہنا تھا کہ کراچی کنگز نے ایک شکست کے بعد کھیل کے ہر شعبے میں بہتری لاتے ہوئے کوئٹہ کے خلاف شاندار کم بیک کیا، اسلام آباد کے خلاف بھی کوشش ہوگی کہ ٹیم حریف کو ابتدا سے دباو میں لے کر اچھے کھیل کا مظاہرہ کرے۔

ٹم سائفرٹ نے کہا کہ دنیا میں فرنچائز کرکٹ بہت زیادہ ہوچکی ہے، پلیئرز کو اس سے مختلف کنڈیشنز میں کھیلنے کا موقع ملتا ہے لیکن ساتھ ساتھ یہ ضروری ہے کہ فرنچائز اور انٹرنیشنل کرکٹ کیلئے فکسڈ کیلنڈر مقرر ہو ۔

انہوں نے کہا حال ہی میں ایسے واقعات ہوئے ہیں جس میں پلیئرز نے قومی کنٹریکٹ چھوڑے ہیں جس کی وجہ فرنچائز اور انٹرنیشنل کرکٹ کے شیڈول کا ٹکراؤ ہی ہے۔

واضح رہے کراچی میں ہوم ٹیم کراچی کنگز نے ملتان سلطانز، لاہور قلندرز اور کوئٹہ گلیڈی ایٹرز کے خلاف میچز کھیلے ہیں تاہم کراچی کا نیشنل اسٹیڈیم ایک میچ میں بھی ہاؤس فل نہ تھا۔