جدہ.........سعودی عرب میں منشیات کی اسمگلنگ کے جرم میں سزا یافتہ تین ایرانی شہریوں کے سر قلم کر دیے گئے ہیں۔

یوں ان مجرموں کی تعداد اب ایک سو پینتالیس ہو گئی ہے جنہیں سعودی عرب میں اس سال سزائے موت دی جا چکی ہے۔ سعودی وزارت داخلہ کے مطابق ایرانی باشندوں کو سنائی گئی سزائے موت پر عملدرآمد کیا گیا ہے۔ انہوں نے سمندری راستے سے بہت بڑی مقدار میں حشیش سعودی عرب اسمگل کرنے کی کوشش کی تھی۔

سعودی عرب کی سرکاری نیوز ایجنسی ایس پی اے کے نشر کردہ ملکی وزارت داخلہ کے ایک بیان کا حوالہ دیتے ہوئے بتایا ہے کہ ان تینوں مجرموں کو یہ سزا ملک کے مشرقی ساحلہ شہر دمام میں دی گئی، اس سال یکم جنوری سے اب تک سزائے موت پانے والے تقریباً ڈیڑھ سو مجرموں میں سے بڑی اکثریت غیر ملکیوں کی تھی۔

اس کے برعکس پورے 2014ء میں سزائے موت پانے والے مجرموں کی تعداد 87 رہی تھی۔ قانونی امور اور انسانی حقوق کے کئی ماہرین کی طرف سے اس بارے میں بار بار تحفظات کا اظہار کیا جاتا ہے۔ لندن میں قائم انسانی حقوق کے بین الاقوامی تنظیم ایمنسٹی انٹرنیشنل کا کہنا ہے کہ سعودی عرب اس سال سب سے زیادہ مجرموں کو سزائے موت دینے کے حوالے سے بین الاقوامی فہرست میں تیسرے نمبر پر آ چکا ہے۔

اس فہرست میں سعودی عرب ،چین اور ایران سے تو کافی پیچھے ہے لیکن عراق اور امریکا سے بہت آگے ہے۔