پیرس.........فرانسیسی لڑاکا طیاروں نے منگل کو شام کے شمالی حصے میں دہشت گرد گروپ داعش کے ٹھکانوں پر حملے کیے ، ادھر پولیس نے پیرس حملوں میں ملوث افراد کی تلاش میں گزشتہ شب ملک بھر میں 128 مقامات پر چھاپے مارے۔

میڈیا رپورٹس کے مطابق فرانسیسی لڑاکا طیاروں نے شدت پسند تنظیم اسلامک اسٹیٹ کے شام میں مضبوط گڑھ الرقہ میں کمانڈ سینٹر اور ایک ریکروٹمنٹ سینٹر کو نشانہ بنایا۔ فرانسیسی ملٹری ترجمان نے خبر رساں ادارے کو بتایا کہ صدر فرانسوا اولاندو کی طرف سے داعش کے خلاف حملوں کا حکم دیے جانے کے بعد یہ مسلسل دوسری رات تھی جب الرقہ میں اس گروپ کے ٹھکانوں کو نشانہ بنایا گیا۔

ان حملوں میں 10 لڑاکا طیاروں نے حصہ لیا جنہوں نے متحدہ عرب امارات اور اردن سے پرواز بھری۔ فرانسیسی دفاعی حکام کے مطابق امریکا نے انٹیلیجنس شیئرنگ کا سلسلہ بڑھا دیا ہے تاکہ پیرس کوداعش سے متعلق واضح اہداف تلاش کرنے میں مدد مل سکے۔

ادھر فرانس میں پولیس نے پیر اور منگل کی درمیانی شب ان دہشت گردوں کو مدد فراہم کرنے والے افراد کی تلاش میں 128 چھاپے مارے۔ فرانسیسی وزیر داخلہ بیرنار کازینوو کے مطابق پولیس نے یہ چھاپے ملک کے مختلف حصوں میں مارے،ان خونریز حملوں کے سلسلے میں جاری تفتیشی عمل میں تیزی سے آگے بڑھ رہی ہے، مزید تفصیلات بتائی نہیں جاسکتی۔