بیجنگ .........چین میں 10 سال قبل لاپتہ ہونے والی خاتون کو انٹرنیٹ کیفے سے برآمد کرلیا گیا جہاں اس نے مبینہ طور پر گزشتہ دہائی گزاری اور گیم کھیلے۔

غیر ملکی میڈیا کے مطابق گزشتہ دس سال سے گمشدہ اور مردہ تصور کی جانے والی چینی لڑکی انٹرنیٹ کیفے میں پائی گئی ہے ۔24 سالہ ژیو یون نے والدین کے ساتھ تلخ کلامی کے باعث 14 سال کی عمر میں گھر چھوڑ دیا تھا۔تاہم ایک پولیس اہلکار نے 20 نومبر کو انٹرنیٹ کیفے کے روٹین چیک کے دوران انہیں صبح کے اوقات میں تلاش کرلیا۔

تلاشی کے دوران اس کے پاس سے جعلی شناختی کارڈ برآمد ہوا جس پر اسے مقامی پولیس اسٹیشن لے جایا گیا جہاں اس نے انکشاف کیا کہ وہ گزشتہ ایک دہائی سے اسی کیفے میں رہائش پذیر تھی ۔اس نے بتایا کہ وہ دن بھر گیم کھیلتی جبکہ رات میں کیفے میں ہی رہتی یا پھر باتھ ہاوس چلی جاتی تھی۔

وہ کیفے میں آنے والے دیگر لوگوں کی جانب سے دی جانے والی رقوم سے گزر بسر کرتی جبکہ کبھی کبھار ہوٹلوں میں کیشئر کے طور پر بھی کام کرتی۔پولیس نے اس پر 1000 یوان کا جرمانہ عائد کرتے ہوئے اسے اس کے گھر والوں کے حوالےکردیا۔