ماسکو......روس کی حکومت نے شام میں روسی فوج کو نشانہ بنانے والے اہداف کو فوری تباہ کرنے کی ہدایات جاری کردیں ۔ وزیر خارجہ سرگئی لاروف کہتے ہیں مغرب بشار الاسد کو ہٹانا چاہتا ہے جو سنگین غلطی ہوگی ۔

روس نے شام میں اپنی کارروائیاں تیز کردیں ۔روسی صدر ولادیمیر پوٹن نے عسکری قیادت سے خطاب میں ہدایت کی روسی فوج کو نشانہ بنانے والے اہداف ’فوری طور پر تباہ‘ کیے جانے چاہئیں ۔

صدر پوٹن کا کہنا تھا کہ شام میں ’دہشت گرد‘ روس کے لیے براہ راست خطرہ ہیں ۔انہوں نے کہا کہ دہشت گردوں کو ختم کرنے کے لیے تمام ریاستوں کے ساتھ تعاون بڑھانا اہم ہے۔ اس مقصد کے لیے پروازوں کی حفاظت کے لیےاسرائیلی فضائیہ کے ہیڈکوارٹرز اور امریکی قیادت میں اتحادی فوج کے ساتھ مسلسل رابطے رکھے جائیں گے ۔

اُدھر روم میں نیوز کانفرنس کرتے ہوئے روسی وزیر خارجہ سرگئی لاروف نے کہا کہ مغرب چاہتا ہے شام میں دہشت گردوں کے خلاف کارروائی سے پہلے بشار الاسد کو ہٹانا چاہیے لیکن ایسا کرنا سنگین غلطی ہوگی ۔

انہوں نے الزام لگایا کہ داعش کے خلاف فوجی کارروائی میں مغربی ممالک مکمل تعاون نہیں کررہے۔ روسی وزیر خارجہ کا کہنا تھا کہ ماسکو لیبیا میں داعش کے ٹھکانوں کو نشانہ بنانے کا ارادہ نہیں رکھتا۔