واشنگٹن........ صومالیہ کے شدت پسند گروہ الشباب کی ویڈیو میں اپنی تقریر کا اقتباس استعمال کیے جانے کے بعد امریکا کی ریپبلکن پارٹی کے صدارتی امیدوار بننے کی دوڑ میں شامل ڈونلڈ ٹرمپ نے ایک مرتبہ پھر مسلمانوں کے امریکہ میں داخلے پر پابندی کے موقف کا دفاع کیا ہے۔

ڈونلڈ ٹرمپ نے کہا ہے کہ لوگوں نے ان کی تعریف کی تھی کہ انھوں نے اس مسئلے پر دیانتداری سے بات کی ہے جس پر بات کرنے سے دوسرے رہنما کتراتے ہیں۔امریکی چینل سی بی ایس سے بات کرتے ہوئے ریپبلکن پارٹی کے امیدوار کا کہنا تھا کہ اب لوگ اس مسئلے پر بات کرنا شروع ہو گئے ہیں۔

کیلیفورنیا میں فائرنگ کے واقعے کے بعد ڈونلڈ ٹرمپ نے کہا تھا کہ مسلمانوں کے امریکہ میں داخلے پر مکمل پابندی عائد کر دینی چاہیے۔ٹرمپ کا کہنا تھا کہ سرحدوں کو اس وقت تک مکمل طور پر بند کر دینا چاہیے جب تک ہمارے ملک کے نمائندگان اس بات کا تعین نہیں کر لیتے کہ کیا ہو رہا ہے۔

ان کے اس بیان کی امریکہ میں شدید مذمت کی گئی تھی اور خود ان کی جماعت کے دوسرے صدارتی امیدواروں، صدر اوباما اور برطانوی وزیرِ اعظم ڈیوڈ کیمرن نے بھی انہیں شدید تنقید کا نشانہ بنایا تھا۔جبکہ صدارتی امیدوار کی دوڑ میں شامل ہیلری کلنٹن کا کہنا تھا کہ ڈونلڈ ٹرمپ شدت پسند تنظیم دولت اسلامیہ کے اتحادی ہیں۔