برلن.........جرمنی کی پولیس کا کہنا ہے کہ جمعرات کو پیرس کے پولیس اسٹیشن پر ناکام حملہ کرنے والا شخص جرمنی میں پناہ گزینوں کے ایک کیمپ میں رہ رہا تھا۔

پولیس نے مغربی شہر ریکلنگ ہائوزن میں عمارت کی تلاشی لی ہے لیکن انھیں وہاں مزید کسی حملے کے شواہد نہیں ملے ہیں۔ابھی یہ واضح نہیں کہ وہ ان پناہ گزینوں میں شامل تھے یا نہیں جو 2015 کے دوران جرمنی آئے تھے۔ اطلاعات کے مطابق اسے ایک ڈکیتی کے معاملے میں فرانس میں 2013 میں گرفتار کیا گیا تھا۔

اور اس کو چارلی ایبڈو واقعے کی سالگرہ پر گولی مار کر ہلاک کیا گیا تھا۔مشتبہ شخص کے پاس گوشت کاٹنے والا چھرا ملا تھا اور وہ نقلی خودکش جیکٹ پہنے ہوئے تھے۔اس کے بدن سے ایک کاغذ کا ٹکڑا ملا ہے جس میں شدت پسند تنظیم دولت اسلامیہ سے ’بیعت اور شام پر فرانسیسی حملے کے بدلے کی بات درج تھی۔

جرمن پولیس کا کہنا ہے کہ وہ پناہ گزینوں کے کیمپ کے جس کمرے میں رہ رہا تھا ، وہاں دیوار پر دولت اسلامیہ کا نشان بنا ہوا تھا۔اس شخص کے اصل وطن کا ابھی پتہ نہیں چل سکا ہے۔ جرمنی کے ویلٹ ایم سونٹاگ اخبار کے مطابق ’فرانس اور جرمنی کے حکام کے مختلف رجسٹر میں اس حملہ آور کی مختلف شناخت ہے۔ کہیں وہ مراکشی ہے تو کہیں تیونسی اور کہیں شامی۔ایسا پہلی بار نہیں ہوا ہے کہ دولت اسلامیہ کے مشتبہ جنگجو کا تعلق پناہ گزینوں سے نکلا ہو۔