27 دسمبر ، 2016 
آئین تمام مذاہب کے لوگوں کو برابر حقوق دیتا ہے، فرحت اللہ بابر
27 دسمبر ، 2016
پیپلز پارٹی کے سینیٹر فرحت اللہ بابر نے کہا ہے کہ پاکستان کا آئین تمام مذاہب کے لوگوں کو برابر حقوق دیتا ہے مگر کوئی غیر مسلم صدر یا وزیراعظم نہیں بن سکتا ، یہ کھلا تضاد ہے۔
پیپلز پارٹی کے سینیٹر فرحت اللہ بابر نے ایس ڈی پی آئی کے زیر اہتمام اسلام آباد میں ایک سیمینار سے خطاب میں کہا کہ جب فلاحی کی بجائےسیکورٹی ریاست بن جائے تو لوگوں کے حقوق سلب ہوتے ہیں ، قومی سلامتی کے تقاضے ،نظریہ پاکستان اور اسلام کو خطرے جیسے معاملات پر پراپیگنڈا ترقی پسند قانون سازی کی راہ میں رکاٹ بن جاتا ہے۔
سینیٹر فرحت اللہ بابر نے کہا کہ سندھ اسمبلی میں اقلیتوں کے حوالے سے منظور ہونے والے بل پر اتنا پریشر آیا کہ اس میں ترامیم کرنا پڑ رہی ہیں، جبری مذہب کی تبدیلی یا شادی جیسے مسائل کو حل کرانے کے لیے مسلسل آواز اٹھاناہو گی ۔
مقررین نے کہا کہ سندھ اسمبلی سے اقلیتوں کا جو بل منظور ہوا ، اس کے خاتمے سے بہتری کی امیدیں دم توڑتی جائیں گی، اقلیتوں کے حوصلے اور امید کو نہ توڑا جائے ۔
