بالی ووڈ کے کنگ خان اور پاکستان کی معروف اداکار ہ ماہرہ خان کی تھرل اور ایکشن سے بھرپور فلم ’رئیس‘ باکس آفس پر دھماکے دار انٹری دینے کے بعداب سو کروڑ کلب میں شامل ہوگئی ہے۔

کنگ خان نے 6 دن میں ’رئیس‘ سے 100 کروڑ کا لمبا چھکا لگا دیا، جبکہ ’قابل‘بھی 75 کروڑ روپے پر ناٹ آؤٹ ہے۔

’فین‘ میں کروڑ کی سنچری سے پہلے آؤٹ ہونے پر شاہ رخ خان مایوس تھے ، لیکن ’رئیس‘ سے انہوں نے صرف 6 دن میں 100 کروڑ کا لمباچھکا لگادیا۔

دوسری طرف ’رئیس‘ کا شاگرد ’قابل‘ بھی رئیس بن چکا ہے، باکس آفس پر ’قابل‘ کا اسکور 75 کروڑ ہوگیا ہے۔

’رئیس‘ نے جہاں شائقین کو اپنا دیوانہ بنا دیا ہے وہیں 6دنوں میں 106اعشاریہ 14کروڑ روپے کا بزنس کرنے میں بھی کامیابی حاصل کرلی ہے۔

اس فلم میں ماہرہ خان پہلی بار بالی ووڈ کے کنگ خان کے ساتھ مرکزی کردار ادا کر رہی ہیں جبکہ نواز الدین صدیقی بھی مرکزی کردار میں اپنی اداکاری کے جوہر دکھاتے نظر آئیں گے۔

اس فلم کی کہانی عبد اللطیف نامی ڈان کے زندگی پر بنائی گئی ہے جس کی کاسٹ میں محمد ذیشان ایوب، روپندر نگرا، آریا بابر، گووندنمدیو اور انیل منگے بھی شامل ہیں۔